Usa ka
miyembro sa Philippine Softball Team sa SEA games gipasidunggan sa
Provincial Government sa Misamis Occidental
Usa ka dakong garbo alang sa
probinsiya sa Misamis Occidental ang partisipasyon sa usa ka
Misamisnon sa bag-ohay palang natapos nga Southeast Asian (SEA) Game
nga gipahigayon dinhi sa Pilipinas.
Si Mark
Rey Ramirez, taga Tangub City maoy usa sa mga miyembro sa
Philippine Softball Team nga nakakuha sa Gold Medal sa
nahisgutang torneyo.
Tungod niini,
isip pag-ila sa talagsaong abilidad ug katakus ni Ramirez sa
dulang Softball ug sa tumong nga madasig ang tanang kabatan-onan
ning lalawigan, ang Provincial Government sa Misamis Occidental
pinaagi kang Gobernador Loreto Leo S. Ocampos ug sa tanang
miyembro sa Sangguniang Panlalawigan motunol ngadto kang Ramirez
sa Plaque of Recognition ug sa kantidad nga Twenty Thousand Pesos
(P20,000.00) isip usa ka incentive.
Kahinumduman
nga ang Pilipinas maoy migulang Over-all Champion sa 2005 SEA Games
diin ang dulang Softball nga giapilan ni Ramirez nakaangkon ug
Gold Medal.
Matud pang
Gobernador Ocampos, "Ang pagka-apil ni Ramirez sa 2005 SEA Games
ug ang kalampusan niini, kalampusan usab sa tibuok Misamis Occidental.
Gipanghinaut sa gobernador nga pinaagi niini, daghan pang taga Misamis
Occidental ilabi na ang mga kabatan-onan ang madasig sa pagbansay
bansay sa nagkalain laing sports kaysa musolod sa guinadiling droga ug
uban pang mga bisyo".
Provincial Information Office
Capitol, Oroquieta City
