TM BALITA

DEC. 13-11

HEADLINES

LIBO -AN KA MGA KAEGSUONAN SA OROQUIETA CITY NAKAPAHIMULOS NA USAB SA NAGPADAYONG OUTREACH MISSION NI GOVERNOR RAMIRO

MGA EMPLIYADO SA KAPITOLYO NAGMAYA SA DUGANG P5K NGA GIPAHIBALO NI GOVERNOR HERMINIA RAMIRO

CONSTRUCTION SA MAJOR RENOVATION SA CAPITOL BUILDING DILI NA MAPUGNGAN

GOVERNOR HERMINIA RAMIRO GIPANIGURO NGA SA SUNOD TUIG ADUNA NAY BAG-ONG BUS ANG PROBINSYA NGA MAGAMIT SA MGA EMPLIYADO SA KAPITOLYO

KAGAMHANANG PROBINSYAL MAINITON NGA MIDUYOG SA NASUDNON NGA PAG-OBSERBAR SA 18-DAYS STOP VIOLENCE AGAINTS WOMEN CAMPAIGN

OATH TAKING CEREMONY SA MGA BAG-ONG MIEMBRO SA MT. MALINDANG EAGLES CLUB GIPAHIGAYON UG CHRISTMAS PARTY SA FRATERNAL ORDER OF EAGLES GISAULOG

IKADUHANG BATCH SA MISAMIS OCCIDENTAL BALIK PINAY ASSOCIATION RECIPIENT NA USAB SA FINANCIAL ASSISTANCE GIKAN SA OWWA ALANG SA ILANG LIVELIHOOD PROGRAM

==

DETALYE:

LIBO-AN KA MGA KAEGSUONAN SA OROQUIETA CITY NAKAPAHIMULOS NA USAB SA NAGPADAYONG OUTREACH MISSION NI GOVERNOR RAMIRO

Laing libo-an na usab ka mga kaigsuonan sa Dakbayan sa Oroquieta City ang pinakaulahing beneficiaries sa nagpadayon nga Medical and Dental Outreach Mission ni Governor Herminia Ramiro.

Ang mga barangay nga pinakaulahing nakapahimulos sa outreach mission mao ang mga kaegsuonan gikan sa sentrong bahin sa syudad kon diin ang Misamis Occidental National High School Campus maoy nahimong venue sa tunga sa adlaw nga kalihukan ug pagkahapon mao ang Barangay sa San Vicente.

Gumikan niini, gikalipay ug gipasalamatan pag-ayo sa katawhan sa maong mga dapit nga natugpahan sila sa maong serbisyo taliwala sa kadaghan sa mga barangay nga sakop sa Oroquieta City.

Apan gipasalig sa kagamhanang probinsyal pinaagi sa pagpanguna ni Governor Herminia Ramiro nga dili magmahay ang ubang mga dapit gumikan kay sa matag karon ug unya adunay gihan-ay nga mga schedule ang gobernadora alang sa pagpahigayon sa maong programa.

==

MGA EMPLIYADO SA KAPITOLYO NAGMAYA SA DUGANG P5K NGA GIPAHIBALO NI GOVERNOR HERMINIA RAMIRO

Wala pa gani nadawat sa mga empliyado sa kapitolyo ang gipasalig ni Governor Herminia Ramiro nga segaradong madawat niini ang tag-20 mil pesos nga christmas bonus sa dili pa ang pasko, karon mipahibalo na usab ang gobernadora nga mapun-an og singko mil pesos ang naunang kantidad sa bonus.

Atol sa gipahigayon nga Flag Raising Ceremony kagahapon sa kapitolyo, gipahayag sa gobernadora nga 25 mil pesos na ang madawat sa regular nga mga empliyado sa kapitolyo ug mas gikalipay pa kini sa mga empliyado.

Kini nga maayong balita, gipahinungod usab sa gobernadora ngadto sa sangguniang panlalawigan pinaagi sa pagpanguna ni Vice Governor Henry Oaminal gumikan kay dili pa tungod kanila dili mapun-an ang mga bonus sa mga empliyado.

Nasayran nga gihimo ang pag-approved sa budget niini atol sa gipahigayong Regular Session sa Sangguniang Panlalawigan niadtong Biernes.

Malaumon ang gobernadora nga unta ikalipay kini sa mga empliyado gumikan kay limitado kaayo ang panudlanan sa kagamhanang probinsyal karong tuiga.

Iyang gipasabot nga ang tag-singko mil pesos nga gidugang sa naunang kantidad sa bonus sa mga empliyado gikan sa mga nagkadaiyang tinubdan sa pundo o savings gawas sa calamity fund.

==

CONSTRUCTION SA MAJOR RENOVATION SA CAPITOL BUILDING DILI NA MAPUGNGAN

Sa dili madugay posible nga sugdan na ang construction sa major renovation sa capitol building.

Kini human gisuportahan sa Sangguniang Panlalawigan pinaagi sa pagpanguna ni Vice Governor Henry Oaminal ang tinguha ni Governor Herminia Ramiro ang pagpalambo sa maong edipisyo.

Matud pa sa gobernadora nga dili makababag sa proyekto ang kritisismo sa iyang mga detractors gumikan kay kaayohan sa katawhan sa probinsya ug sa mga empliyado mismo sa kapitolyo ang iyang gihimo.

Lig-on sa iyang baroganan ang gobernadora sa iyang desisyon alang sa pagpalambo sa estraktura sa capitol building gumikan kay gikinahanglan kini pag-ayo nga maayo bunga sa kakaraan na sa maong edipisyo.

Hugtanong gipanghimatuod sa gobernadora nga bisan sa usa ka sentimo wala siya’y mahimo niini kun’ hisgotan man gani ang giingong korupsyon.

Ang dakong tinguha sa gobernadora kun’ nganong iya kining gipadayon aron sa tuyo nga mas epektibo pa ang kagamhanang probinsyal nga mohatag og dalaygon ug kombeniente ngadto sa tibuok katawhan sa Misamis Occidental.

==

GOVERNOR HERMINIA RAMIRO GIPANIGURO NGA SA SUNOD TUIG ADUNA NAY BAG-ONG BUS ANG PROBINSYA NGA MAGAMIT SA MGA EMPLIYADO SA KAPITOLYO

Madasigon nga mipahibalo si Governor Herminia Ramiro nga sa dili madugay aduna nay bag-ong bus nga magamit ang mga empliyado sa kapitolyo.

Kini human nahan-ay ang tanang mga dokumento alang sa klarong pag-angkon sa bag-ong bus.

Matud pa sa gobernadora nga sa matag karon ug unya, iya gayu’ng gi-monitor ang proseso sa mga dokumento, kini gumikan sa iyang gibating kaluoy sa mga empliyado nga nag-antos sa guba-on nga mga mini-bus.

Kinasingkasing usab nga nangayo og despensa sa gobernadora gumikan sa wala damha  nga kakulian sa unang midangat nga mga bus.

==

KAGAMHANANG PROBINSYAL MAINITON NGA MIDUYOG SA NASUDNON NGA PAG-OBSERBAR SA 18-DAYS STOP VIOLENCE AGAINTS WOMEN CAMPAIGN

Kun’ hisgotan ang mga programa nga may kalambigitan ang kaayohan sa mga kababayen-an, kini hugtanon gayud nga gisuportahan sa kagamhanang probinsyal.

Kini ang hinungdan nga halos ang tanang kababayen-an ug kalalaken-an nanagsuot gayud og mga pulang mga senina labina sa mga t-shirt gumikan sa mainiton nga pagduyog sa kagamhanang probinsyal sa pagtapos sa dise-otso kaadlaw nga pag-obserbar sa nasudnon nga kampanya sa Stop Violence Against Women kagahapong adlawa.

Usa sa gipasigarbong programa nga natampo sa gobernadora kalabot sa kaayohan sa mga kababayen-an sa tibuok probinsya, mao ang pagsuporta niini sa pag-establisar og mga Violence Against Women and children’s desk sa mga kabarangayan sa tibuok probinsya.

Gawas sa bulok pula nga maoy official color sa pagtapos sa dise-otso kaadlaw nga kampanya sa stop Violence Against Women, nahimong paborito usab sa gobernadora ang pula gumikan kay kalibotanhon usab kini nga bulok sama sa Christmas Celebration, Birthday ug Valentines Day.

Sa laktod nga pagasulti, ang red color, nagsibulo sa gugma, kalipay ug panaghiusa labina na nga mipahibalo ang gobernadora nga madugangan ang nahaunang bonus sa mga empliyado sa kapitolyo.

==

OATH TAKING CEREMONY SA MGA BAG-ONG MIEMBRO SA MT. MALINDANG EAGLES CLUB GIPAHIGAYON UG CHRISTMAS PARTY SA FRATERNAL ORDER OF EAGLES GISAULOG

Sadya ug mabulokon ang gipahigayon nga christmas party  sa kahugpungan sa Mount Malindang Eagle’s club adtong Sabado Disyembre 10, 2011 diin gitambongan kini sa mga National ug Local Officials sa the Fraternal Order of Eagle’s didto sa Bethany Gardens sa Dakbayan sa Ozamiz.

Gipasabot ni kuya Jimmy Cabatu ang national  assembly man sa the Fraternal Order of Eagle’s nga nakabasi sa Zamboanga  ug kasamtangang  Ist Councilor sa Zamboanga City nga gikalipay niya ug dako ang gipakitang hospitality  sa mga  kuya ug ate ug mga bunso sa Mount Malindang Eagle’s Club nga miabi-abi kanila nga taga Zamboanga City kinsa maoy pinasidunggan dinapit sa Mount Malindang Eagle’s club xmas party ug induction of officers ug  mao usab ang inducting officer  atol sa pagpahigayon usab sa induction of officers sa mga maong mga opesyales sa nasangpit nga kahugpungan nga gipangulohan ni kuya Boy Pelare.

Samtang didto usab  sila si Municipal Mayor sa Clarin kuya David Navarro kanhi Presidente sa OCEC, kuya Ed Mocsan ang presidente usab sa Mahayag  Eagles  Club ug kuya Jr Buenafe sa Salug Valley Eagle’s Club ug  uban pang mga chapter nga nagagikan sa nagkalain-laing dapit Western Mindanao Region.

Samtang usa sa ilang  gi-imbitar  usab mao si Governor Hermie Ramiro atol sa maong okasyon  isip honorary officer sa nasangpit nga kahugpungan apan tungod sa kadaghan sa mga kalihukan sa gobernadora adtong tungora wala na kini matambong sa nasangpit nga  okasyon.

==

IKADUHANG BATCH SA MISAMIS OCCIDENTAL BALIK PINAY ASSOCIATION RECIPIENT NA USAB SA FINANCIAL ASSISTANCE GIKAN SA OWWA ALANG SA ILANG LIVELIHOOD PROGRAM

Gikalipay sa kahugpungan sa mobpa kon misamis occidental balik pinay association dinhi sa misamis occidental nga nakadawat na usab sa mga starter kit alang sa ilang livelihood program nga giayudahan sa overseas workers welfare association ingon man sa dole.

Gipahayag ni Ms.  Petrona Bergado Regional Director sa OWWA, Region 10 nga andam ang ilang buhatan sa pagsuporta sa mga Overseas Filipino Workers nga nahimong biktima sa ilang mga amo didto sa laing nasud alang sa ilang pagsugod sa ilang kapaninguhaan alang sa ilang matag pamilya.

Mipadangat usab si Director Bergado sa iyang pasalamat sa padayong suporta ni Governor Hermie Ramiro alang sa kahugpungan sa MOBPA nga nagkinahanglan sa ayuda sa gobernador.

Samtang mipadayag sab sa iyang pasalamat ang presidente sa MOBPA uban sa iyang mga kaubanan ngadto kang Governor Hermie Ramiro nga walay puas sa paghatag sa iyang tabang nadto kanila, ingon man sa mga kadagkoan sa OWWA ug sa DOLE nga mihatag usab sa ilang tabang alang sa mga Overseas Filipino Workers nga nagpadayag nga dinhi nalang sila manginabuhi alang sa ilang pamilya.

==

TM BALITA

DEC. 12-11

HEADLINES:

DEPARTMENT OF EDUCATION MIPADANGAT SA ILANG MAINITON NGA PAGPASALAMAT NGADTO NI GOVERNOR HERMINIA RAMIRO GUMIKAN SA SUPORTA LABINA SA SPECIAL CHILDREN

CIVIL SERVICE COMMISSION MIAWHAG SA MGA EMPLIYADO SA GOBYERNO NGA HATAGAN OG DAKONG IMPORTANSYA ANG PAGPANARBAHO

MGA GUINIKANAN SA BRGY. CABOL-ANONAN, TUDELA MIPAKITA SA ILANG KAHANAS SA PAGSAYAW ATOL SA 34^TH PARENTS NIGHT

GOVERNOR HERMINIA RAMIRO MIPADANGAT SA IYANG MAINITON NGA PAGTIMBAYA SA 34^TH PARENTS NIGHT SA BRGY. CABOL-ANONAN

KAGAMHANANG LOKAL SA LUNGSOD SA TUDELA, NAKADAYEG SA NAKITANG PANAGHIUSA  SA KATAWHAN SA BRGY. CABOL-ANONAN

AUSTRALIAN GOVERNMENT GIILA NI GOVERNOR HERMINIA RAMIRO NGA KAABAG SA ALANG SA KALAMBO-AN SA MISAMIS OCCIDENTAL

==

DETALYE:

DEPARTMENT OF EDUCATION MIPADANGAT SA ILANG MAINITON NGA PAGPASALAMAT NGADTO NI GOVERNOR HERMINIA RAMIRO GUMIKAN SA SUPORTA LABINA SA SPECIAL CHILDREN

Usa ka token ang personal nga gitunol ngadto kang Governor Herminia Ramiro gikan sa mga Special Pupils sa Special Education Program sa City Central School, Oroquieta City.

Matud pa ni Ms. Miladith Putotan, Special Education Teacher nga ang maong token, usa ka pagpasalamat gikan sa Department of Education bunga sa nahimong suporta ni Governor Ramiro sa programa sa edukasyon sa probinsya labina sa mga Special Children.

Ang suporta nga gipasabot ni Putotan sa programa sa edukasyon, naglangkob na niini ang programa sa maayong panglawas nga napahimuslan sa mga Special Children sa Misamis Occidental Provincial Rehabilitation Center, Scratches, Wheelchairs ug daghan pang uban.

Mainiton usab nga gidawat sa gobernadora ang token sa dihang gitunol kini sa mga Special Children uban sa mga miembro sa Strategic Alliance for Networking on Disability kon stand uban ni Ms. Marichu Tijing, ang administrative officer sa Misamis Occidental Provincial Rehabilitation Center atol sa Flag Raising Ceremony sa kapitolyo niadtong miaging simana.

Gumikan niini nanghinaot si Putotan nga unta magpadayon ang suporta sa kagamhanang probinsyal pinaagi sa pagpanguna ni Governor Herminia Ramiro aron mas daghan pang mga Special Children ang makapahimulos ug matabangan sa programa.

==

CIVIL SERVICE COMMISSION MIAWHAG SA MGA EMPLIYADO SA GOBYERNO NGA HATAGAN OG DAKONG IMPORTANSYA ANG PAGPANARBAHO

Gipasalig sa Civil Service Commission Provincial Office nga andam silang motabang labina sa mga ayudang teknikal ngadto sa mga empliyado sa gobyerno apan hugtanon usab nilang giawhag ang mga empliyado nga kinahanglan usab nga ilang hatagan og dakong pagtagad ang ilang pagpanarbaho.

Matud pa ni provincial director Wulfreda Tapulgo, Civil Service Commission Misamis Occidental Provincial Office nga kinahanglan gayud nga bugti-an usab og maayong performance ang ilang pagpanarbaho bunga sa unemployment rate karon sa nasud labina sa atong probinsya.

Niining higayona, daghan ang mga individual nga nanginahanglan karon og trabaho labina sa mga kababayen-an nga kutob na lamang sa gimbuhaton sa panimalay.

Kun’ adunay mga tulomanon nga gikinahanglan ang serbisyo, kinahanglan gayud kining tumanon gumikan kay andam man usab kining bayran sa gobyerno pinaagi sa pag-claim og overtime.

Gidasig usab niya ang mga empliyado labina niadtong mga bag-o pa sa trabaho nga kinahanglang ana-a gayud ang dedikasyon sa trabaho, pailob ug determinasyon aron sa tuyo nga molungtad sa trabaho ug mamahimong malambuon nga empliyado sa umaabot.

Gikinahanglan usab ang maayong relasyon ug delikadisa ang matag usa aron adunay maayong teamwork ang mga empliyado sa usa ka buhatan.

==

MGA GUINIKANAN SA BRGY. CABOL-ANONAN, TUDELA MIPAKITA SA ILANG KAHANAS SA PAGSAYAW ATOL SA 34^TH PARENTS NIGHT

Dili katohan nga ingon niini pa kaabtik ug kalig-on sa mga tuhod labina sa mga hamtong og pangidaron ug mga senior citizen nga miapil sa dance showdown contest atol sa gipahigayon nga 34^th Parents Night niadtong huwebes sa gabi-i sa Barangay Cabol-Anonan, Tudela.

Adunay unom ka mga purok ang misalmot sa dance contest nga nagrepresentar usab sa unom ka mga purok nga sakop sa maong barangay.

Taliwala sa pagbundak sa pag-ulan ug kagamay sa ilang public market, nagmalampuson gihapon kini gumikan sa kaikag sa mga tagi-barangay nga misalmot sa kompetisyon pinaagi sa pagpanguna sa mga barangay official.

Nasayran nga 34 katuig na kining giselebrar sa mga residente matag Disyembre 8 ang parents night kon diin ang mga bana ug asawa gayud ang moparitisipar isip vida sa selebrasyon.

Gawas sa Dance Showdown Contest, gikoronahan usab ang nahimong hara niining tuiga.

==

GOVERNOR HERMINIA RAMIRO MIPADANGAT SA IYANG MAINITON NGA PAGTIMBAYA SA 34^TH PARENTS NIGHT SA BRGY. CABOL-ANONAN

Gikalipay usab pag-ayo ni governor herminia ramiro ang ingon niini nga kalingawan kon diin matawag nga diha lamang mahitabo sa barangay cabol-anonan, tudela.

Gumikan sa kasibot usab sa gobernadora gumikan sa gamay’ng salu-salo usab sa iyang panimalay sa Ozamiz City alayon sa selebrasyon sa Patron Emaculada Concepcion, wala siya katambong sa imbitasyon sa mga Barangay Officials atol sa parents night, hinungdan nga mipadala lamang kini og representante ang atong kauban sa TMC nga si Loloy Tajado.

Apan nahimong sadya gihapon ang selebrasyon sa barangay gumikan sa gihatag nga pahalipay sa gobernadora nga maoy gibahin-bahin isip premyo sa mga nagkadaiyang dula.

Nanghinaot ang gobernadora nga unta ipadayon ang ingon niini nga tradisyon sa mga kaegsuonan sa Cabol-anonan gumikan kay usa kini ka kalingawan nga mas labi pang mahiusa ang mga residente.

==

KAGAMHANANG LOKAL SA LUNGSOD SA TUDELA, NAKADAYEG SA NAKITANG PANAGHIUSA SA KATAWHAN SA BRGY. CABOL-ANONAN

Wala na kabantay sila si mayor estella ubot-estaño ug vice mayor samuel parojinog uban sa lain pang mga municipal official sa lungsod sa tudela nga medyo lalom na man diay ang kagabhi-on.

Kini bunga sa ilang pagkalingaw sa mga nagkadaiyang presentasyon sa mga guinikanan nga misalmot sa mga nagkadaiyang kalingawan labina ang dance showdown contest.

Maila sa mga panagway sa mga Municipal Official nga nalipay usab sila sa gihimong selebrasyon sa mga kaigsuonan sa Barangay Cabol-anonan.

Matud pa nila nga sa tibuok sakop sa Lungsod sa Tudela ang maong barangay lamang ang adunay ingon niini nga kalingawan matag tuig nga mao ang Parents Night ug matawag usab nga nag-inusara kini sa tibuok probninsya.

Gumikan sa kadaghan sa mga kaigsuonan nga misaksi sa kalingawan, hilabihan gayud kaguot ang ilang Public Market.

Kini ang hinungdan nga mipasalig ang mga official nga ilang paninguha-on nga magahinan og pundo ang maong facilidad aron kini mapalambo.

Gidasig usab niini ang uban pang mga Barangay sa Tudela nga magpahigayon og susama niini nga kalihukan aron mas labi pang magkahiusa ang katawhan.

==

AUSTRALIAN GOVERNMENT GIILA NI GOVERNOR HERMINIA RAMIRO NGA KAABAG SA ALANG SA KALAMBO-AN SA MISAMIS OCCIDENTAL

Matawag nga kabahin na sa kasaysayan sa kalambo-an sa probinsya sa Misamis Occidental ang Australian Government.

Kini bunga sa mga programa ug proyekto nga nahatag niini sa probinsya nga dekada na ang gidugayon.

Gumikan niini, kinasingkasing nga mipadangat sa iyang pagpasalamat ang Governor Herminia Ramiro labina ngadto sa mga representante sa Australian Government atol sa gipahigayon nga Turnover Ceremony sa Road Development ilalom sa pagpatuman sa Provincial Road Management Facility kon PRMF niadtong miaging simana sa Lungsod sa Baliangao.

Dili lamang kutob sa infrastructure ang mga proyekto nga gihatag sa australian government sa probinsya kon dili lakip na ang human development sa mga empliyado sa kapitolyo nga gihatagan og scholarship program ang mga empliyado nga mapalambo ang ilang kahanas sa pagpanarbaho pinaagi sa pagpailalom og training didto sa Australia.

Gawas niini, nahimo usab nga kaabag ang australian aid alang sa transparency sa pagasto sa pundo sa probinsya ug tataw nga pagpatuman sa mga buhis.

==