TM BALITA
Nov. 26, 2011
HEADLINES:
LUMULUPYO SA BARANGAY PUNTASULONG, BALIANGAO, MISAMIS OCCIDENTAL MIPASALAMAT SA PLANO NGA PRMF ROAD REHABILITATION PROJECT SA ILANG BARTANGAY
BARANGAY KAPITAN SA BARANGAY PUNTASULONG SA LUNGSOD SA BALIANGAO MIPASALAMAT SA PHASE 2 PROJECT SA PRMF
MGA KAEGSUONAN KINAHANGLANG VIGILANTE SA MASINATING MGA PAGBAHA BUNGA SA MAKUSOG NGA PAGBUNDAK SA ULAN
GOVERNOR HERMIE RAMIRO PADAYONG MOPAHIGAYON SA PAGBISITA SA MGA BARANGAY SA PROBINSYA
CONG. JORGE ALMONTE MIHATAG SA IYANG SUPORTA SA MGA KAPITANES SA TIBUOK PROBINSYA
MGA OPISYAL SA TESDA UG MGA GRADUATES MAPASALAMATON SA MGA OPISYAL ILABINA KANG GOBERNOR RAMIRO SA SUPORTA SA ILANG PROGRAMA
==
DETALYE:
LUMULUPYO SA BARANGAY PUNTASULONG, BALIANGAO, MISAMIS OCCIDENTAL MIPASALAMAT SA PLANO NGA PRMF ROAD REHABILITATION PROJECT SA ILANG BARTANGAY
Libaongon ug guba kaayong karsada ang usa ka dakong suliran samga lumulupyo sa Barangay Punta Sulong sa Lungsod sa Baliangao
Kini nga suliran ang dugay nang gi-antus sa mga lumulupyo sa nasangpit nga barangay nga diin nakaapekto sailang pagpanginabuhi sanglit nakahatag kini kanila sa kalisod sa pagtumod sailang mga produkto ngadto sa sentrong bahin sa lungsod o sa merkado.
Subay niini, dako ang kalipay ug pasalamat sa mga lumulupyo sa Barangay Punta Sulong sa dihang mihimo sa pagbisita ug pag-inspection ang mga taga-PRMF sa ilang barangay road aron pahimutangan sa usa ka road rehabilitation project.
Sumala pa ni Antonio Calinacion, usa sa mga residente sa nasangpit nga barangay nga pasalamat sila kon matuman ang nasangpit nga proyekto sanglit mahatagan na sa kasulbaran ang dugay na nilang giantus nga suliran sa kalisod sa ilang dalan nga agi-an.
Malaumon ang mga taga-Barangay Punta Sulong nga pinaagi sa maong proyekto mapasayon na unya ang ilang pagbyahe sa ilang mga produkto ug mas mapalambo pa ang ilang pagpanginabuhi.
==
BARANGAY KAPITAN SA BARANGAY PUNTASULONG SA LUNGSOD SA BALIANGAO MIPASALAMAT SA PHASE 2 PROJECT SA PRMF
Mipasalamat sa mga nagdumala sa PRMF Project si Punta Sulong Barangay Captain Sammy Ahat sa phase 1 nga proyekto sa PRMF nga napahimutang sa iyang barangaynga diin giinspection na sa mga PRMF AUSAID Officials niadtong milabayng adlaw, adlawng Miyerkoles Nobyembre 23, 2011.
Sumala pa ni Kapitan Ahat nga magpasalamat usab sila sa extension nga ipahigayong sa road rehabilitation sa barangay road sa ilang barangay.
Nasayran nang nahatagan sa phase 1 PRMF road rehabilitation project ang barangay road sa Barangay Punta Sulong ug niining ikaduhang hugna sa nasangpit nga proyekto nahatagan usab sila sa phase 2 road rehabilitation project sa PRMF.
Subay niini mapasalamaton usab si Kapitan Ahat ngadto ni Governor Hermie Ramiro sa paghatag ug dakong pagtagad sa mga suliran sa kabarangayan pinaagi sa paghatag oig mga proyekto nga ikalambo sa katawhan dili lang sa ilang barangay kon dili sa tibook Probinsya sa Misamis Occidental.
==
MGA KAEGSUONAN KINAHANGLANG VIGILANTE SA MASINATING MGA PAGBAHA BUNGA SA MAKUSOG NGA PAGBUNDAK SA ULAN
Padayon nga nagpahinumdum karon ang kagamhanangprobinsyal sa Misamis Occidental pinaagi sa Provincial Disaster Risk Reduction and Management Council ngadto sa mga kaegsuonan nga kinahanglang kanunay gayud nga magbinantayon niining masinati nga mga pagbundak sa ulan gumikan kay moresulta kini sa mga pagbaha ug paglunop.
Nasayran nga mas hamyang karon sa mga pagbaha ang mga panimalay ug mga residente nga ana-a dapit nanimuyo duol o daplin sa mga kasapaan ug kasupaan.
Niining simanaha, pipila na kagabi-i nga masinati gayud ang kusog nga pagbundak sa ulan sa tibuok probinsya, gumikan niini aduna nay pipila ka mga Lungsod sa Misamis Occidental ang nakasinati sa mga pagbaha labina sa kagabhi-on, usa niini ang Lungsod sa Tudela.
Gumikan niini, hugtanon nga mipahinumdum ang kagamhanang probinsyal nga niining higayona nga ana-a sa kahimtang sa emerhensya ang probinsya, kinahanglang hinumduman ang mga nangakat-onan sa mga seminar mahitungod disaster preparedness
Kun’ ang matag usa adunay pagpakabana sa kaugalingong ug palibot mas layo ang kahigayonan gikan sa mga kadaotan bunga sa kalamidad
Sumala pa sa pagasa nga walay bagyo nga naumol sa mga kadagatan nga nagpalibot sa nasud apan ang atong masinati nga pag-ulan karon resulta kini sa inter-tropical convergence zone kon ITCZ.
==
GOVERNOR HERMIE RAMIRO PADAYONG MOPAHIGAYON SA PAGBISITA SA MGA BARANGAY SA PROBINSYA
Alayon sa iyang programa nga personal nga makabisita ug makadungog sa tingog sa mga lungsoranon, padayong ipahigayon ni Governor Hermie Ramiro ang iyang nasugdan nang Governor’s Barangay Visitation and Consultation sa mga Lungsod ning Probinsya.
Una nang nabisita sa gobernadora ang mga lungsod sa Concepcion, Lopez Jaena, Calamba ug bahin sa Lungsod sa Sapang Dalaga.
Gituyo ni Governor Ramiro ang maong programa aron personal nga makita ug madungog ang kahimtang ug mga problema sa atong m ga kaigsoonan sa mga kabarangayan
Kahinumdoman nga nalangan ang pagbisita sa gobernadora sa mga lungsod tungod sa kapuliki sa mga aktibidades nga gihimo atol sa selebrasyon sa bag-ohay pa lang natapos nga 82nd Provincial Anniversary.
Gipahibalo usab ni Governor Hermie Romiro ang ginapahigayong people’s hour sa iyang residensya sa Ozamiz City matag adlaw nga miyerkoles alang niadtong nalisdan sa pag adto sa Oroquieta City tungod sa kalayo niini ilabina alang sa iyang mga constituents sa 2nd district.
Tuyo niini nga makaduol ang mga katawhan, makahangyo ug maka-follow-up sa ilang mga tuyo inabagan sa iyang mga assistants didto sa iyang balay.
Alang sa mga taga district one, bukas kanunay ang iyang opisina alang sa tanan, kini alayon sa padayong programa sa gobernador nga sayon maduol ug makonsulta sa katawhan sa probinsya
==
CONG.JORGE ALMONTE MIHATAG SA IYANG SUPORTA SA MGA KAPITANES SA TIBUOK PROBINSYA
Dako ang kalipay nif 1st District of Misamis Occidental Representative Congressman Jorge Almonte sa pagpahigayon sa 1st Provincial Liga Congress
sa iyang statement of support nga gipasupot sa maong panagtigom, gipahayag ni Congressman Almonte ang dakong kalipay nga makita ang mga opisyal sa probinsya partikular ang mga nagkalain- laing lideres sa barangay nga nagkahiusa sa usa ka kolor.
“How Pleasant and Wonderful it is for the People of God to Live in Unity,” bisan sa nagkalain laing partido sa nakalabay nga eleksyon, nagkahiusa sila sa color pula nga maoy kolor nga gisuot sa mga kapitanes nga mitambong sa maong panagtigom.
Gipahayag usab sa Congressman ang iyang dakong suporta sa panaghugpong pinaagi sa suporta sa iyang kapikas, si Provincial Liga President Virginia Aurora Almonte nga matod pa, andam moserbisyo sa katawhan ingong ilang alagad.
Gipahinumdoman usab sa kongresista ang mga kapitanes sa tinuod nga kahulogan sa ilang panerbisyo ingong public officials
“Success Against Your Own People is the Worst Kind of Failure –ang kadaugan kontra sa imong katawhan mao ang imong pinakadakong kapildihan,” nga nagpahinumdom sa mga kapitanes nga ingong mga alagad, sila gihatagan sa kahigayonan sa labawng makagagahom nga makadala sa gahom aron makaserbisyo sa katawhan.
Gipahinumdom usab niya nga ang mga programang gihimo sa national nga pangagamhanan sama sa 4Ps Program mapadangat lamang sa mga kabarangayan pinaagi sa mga opisyal sa barangay partikular na sa mga barangay kapitan.
Sa paghisgot sa panaghiusa sa pangalagad sa katawhan, gipakita ni Congressman Almonte ang teamwork tali kaniya ug ni governor hermie ramiro sa pagdala sa serbisyo sa kabarangayan partikular ang serbisyo alang sa maayong panglawas.
Gipahinumdoman ni kongresista almonte ang mga kapitanes nga human sa eleksiyon, human sa ilang paghural, trabaho gilayon ang sunod, trabaho alang sa katawhan
==
MGA OPISYAL SA TESDA UG MGA GRADUATES MAPASALAMATON SA MGA OPISYAL ILABINA KANG GOBERNOR RAMIRO SA SUPORTA SA ILANG PROGRAMA
Mipadayag og dakong pasalamat ang mga kadagkoan sa buhatan sa TESDA sa pagpangulo ni TESDA Provincial Director Leo Velez ug sa mga tesda graduates ngadto sa mga opisyales sa barangay mamangang dako, sa plaridel lgu ug sa probinsyal nga pangagamhanan ni Governor Hermie Ramiro sa suporta niini ngadto sa mga programa sa buhatan sa tesda, ilabina sa TESDA Specialista Technopreneurship Program nga nakatabang og dako sa mga panginahanglanon sa komunidad, ilabina sa mga teknikal nga serbisyo nga diin sa sentrong bahin lamang sa lungsod ug syudad kini makita.
Ang TESDA Specialista Technopreneurship Program gimugna aron kahatagan sa kasulbaran ang pagkawalay trabaho sa mga TESDA graduates pinaagi sa paghatag kanila sa kahigayunan nga makapundar sa ginagmayng trabaho pinaagi sa mga ayuda nga ihatag sa mga investors sa programa aron sa ingon mapalmbo nila ang ilang panginabuhi.
Alayon usab sa programa ni Gobernador Hermie Ramiro, ang GO HERMIE Program, nga diin nagalantaw nga kahatagan sa maayong kaugmaon ug panginabuhi ang kabatan-onan pinaagi sa paghatag kanila sa mga ayuda sa pag-eskwela ug pagsuporta sa pagpalambo sa mga ginangmayng panginabuhi niini sama sa mga micro-enterprise.
Katuyuan sa pagsuporta ni Governor Ramiro sa TESDA Specialista Technopreneurship Program aron mahimong self sufficient ug produktibo ang kabatan-onan ilabina niadtong mga bag-ong gradwar nga wala pay mga trabaho, aron sa ingon aduna silay mahimong alternatibong trabaho ug pinaagi usab niini mas mahalikay sila sa mga bisyo sama sa druga ug uban pa.
==