TM BALITA
Nov. 4, 2011
HEADLINES:
SURGICAL MISSION NGA GIALAYON SA PAGSAULOG SA IKA 82 KA ANIBERSARYO SA PROBINSYA SA MISAMIS OCCIDENTAL, GIHUGUPAN SA KATAWHAN
GOVERNOR HERMIE RAMIRO MIPASIDUNGOG UG MIPASALAMAT SA MGA MAGTUTUDLO SA LUNGSOD SA SAPANGDALAGA NGA MIPAUBOS SA MID YEAR REVIEW ASSESSMENT
GOVERNOR RAMIRO MIHANGYO SA SUPORTA UG KOOPERASYON SA KADAGKOAN SA DEP ED UG SA MGA MAGTUTUDLO ALANG SA KALAMPUSAN SA MGA PROYEKTONG PANG-EDUKASYON
MGA MAGTUTUDLO SA BARANGAY CALUYA MIPASALAMAT SA PAGSALUDO NI GOVERNOR RAMIRO SA ILANG SERBISYO
MEDICAL AND DENTAL MISSION NI GOVERNOR HERMIE RAMIRO SA BARANGAY CALUYA UG BARANGAY MANLA GIPASALAMATAN SA KATAWHAN
GOVERNOR HERMIE RAMIRO MIPASALAMT UG MIHANGYO SA TANANG LIDERES SA PROBINSYA SA PAGPAKIGHIUSA ALANG SA KALAMPUSAN SA PAGSAULOG SA IKA-82 KA ANIBERSARYO SA PROBINSYA SA MISAMIS OCCIDENTAL UG SA PAS’UNGKO S’G MIS OCC 2011
DETALYE:
SURGICAL MISSION NGA GIALAYON SA PAGSAULOG SA IKA 82 KA ANIBERSARYO SA PROBINSYA SA MISAMIS OCCIDENTAL, GIHUGUPAN SA KATAWHAN
Gihugupan sa mga kaigsoonang misamisnon nga nakapasar sa mga medical screening ang surgical mission nga gipahigayon sa Misamis Occidental Provincial Hospital kon MOPH ug Saint Therese Hospital sugod karong adlawa Nobyembre 3 hangtod ugmang adlawa Nobyembre 4, 2011.
Ang nasangpit nga surgical mission naglangkob sa mga serbisyong pagpangopera sa mga eye cataract ug sa mga bungi, nga diin ubay-ubay gayod nga mga misamisnong pasyente nga nagagikan sa nagkalain-laing dapit sa probinsya ang nakapahimulos nga libre niini.
Kahinumduman nga ang surgical mission o pagpangopera sa mga bungi ug sa mga eye cataract ang usa sa mga highlight activities nga nakahan ay atol sa pagsaulog sa ika-82 ka anibersaryo sa pagkamugna sa probinsya sa misamis occidental, isip gasa o sayong pinaskuhan ni Governor Hermie Ramiro sa mga misamisnong walay sarang ikagasto sa pagpaopera.
Nasayran nga gipahigayon ang pagpangopera sa eye cataract sa Saint Therese Hospital samtang ang pagpangopera sa mga bungi gipahigayon sa provincial hospital.
GOVERNOR HERMIE RAMIRO MIPASIDUNGOG UG MIPASALAMAT SA MGA MAGTUTUDLO SA LUNGSOD SA SAPANGDALAGA NGA MIPAUBOS SA MID YEAR REVIEW ASSESSMENT
Mipadangat sa iyang pasidungog ug pasalamat si Governor Hermie Ramiro ngadto sa mga magtutudlo sa Lungsod sa Sapang Dalaga, atol sa ilang gipahigayong Mid-Year Review Assessment kon Teachers Teaching Upgrading Training niadtong milabayng semana.
Gipasidunggan ni Governor Ramiro ang pagkabayanihong buhat sa mga magtutudlo pinaagi sa ilang walay kaluya nga sakrapisyo sa pagmatuto sa mga kabataan diha sa mga tunghaan.
Gipadayag ni Governor Ramiro nga dako ang role nga gihimo sa mga magtutudlo sa pag-umol sa maayong mga kaugmaon sa mga kabataan, pinaagi sa ilang pagtudlo niini sa mga maayong pagtulun-an nga maoy mahimong gabayan sa ilang kaugmaon, ilabina sa pagpanginabuhi.
Sumala pa sa gobernadora nga alang kaniya, dako ang iyang utang kabubut on sa mga magtutudlo sanglit sila ang nag-umol kaniya nga mamahimong professional ug makab-ot kung unsa man ang iyang naabot karon.
Hinungdan nga saludo gayod si Governor Ramiro sa pagkabayani sa mga magtutudlo dili lang sa lungsod sa Sapang Dalaga kon dili sa tibook nasud.
Gipanghinaut usab sa gobernadora nga ang kadasig sa mga magtutudlo sa pag-umol sa mga maayong kaugmaon sa kabataan ang mas mapalig-on pa, kahatagan sa dakong pagtagad ug pasidungog.
GOVERNOR RAMIRO MIHANGYO SA SUPORTA UG KOOPERASYON SA KADAGKOAN SA DEP ED UG SA MGA MAGTUTUDLO ALANG SA KALAMPUSAN SA MGA PROYEKTONG PANG-EDUKASYON
Daghang kakulangon sa mga programa, proyekto ug pasilidad alang sa natad sa edukasyon sa kabataan sa probinsya sa misamis occidental nga diin usahay nakapahimo kining babag sa ubang oportunidad nga ipahimutang unta dinhi sa probinsya.
Sama na lamang sa gihanyag sa Region X Dep Ed Regioal Director ngadto ni Governor Hermie Ramiro nga plano kabahin sa venue sa umaabot nga Northern Mindanao Regional Athletic Association Sports Compettition nga dinhi unta sa Misamis Occidental ipahigayon.
Gipasabot sa gobernadora nga dako unta kini nga dungog sa probinsya apan kini ang gibalibaran ni Governor Ramiro gumikan sa dakong kakulangon sa probinsya sa mga pasilidad alang sa sports activities.
Gipaklaro usab ni Governor Ramiro nga ang nasangpit nga kakulangon sa mga pasilidad sa sports dinhi sa probinsya ang gihatagan ni sa iyang pangagamhanan sa tukmang aksyon,
Sumala pa sa gobernadora nga aduna nay memorandom of agreement nga gihimo ang Dep Ed, Provincial Government ug lokal nga pangagamhanan sa Oroquieta City sa pagpangulo ni Mayor Jason Almonte, uban usab ni First District Congressman Jorge Almonte kabahin pagtinabangay sa paghatag og ayuda alang sa pagpatukod sa mga pasilidad sa sports nga ipahimutang sa Oroquieta City, partikularmente sa Sports Complex nga planong ipahimutang sa Misamis Occidental National High School Ground.
Subay niini mipadayag ang gobernadora sa paghangyo ug pagdasig sa kadagkoan sa Dep Ed ug sa mga magtutudlo sa pagsuporta ug pagkooperar sa mga programa ug proyekto alang sa dugang pang kalamboan sa natad sa edukasyon sa probinsya.
MGA MAGTUTUDLO SA BARANGAY CALUYA MIPASALAMAT SA PAGSALUDO NI GOVERNOR RAMIRO SA ILANG SERBISYO
Dili ikalimod ug tataw sa tanan ang bayanihong serbisyo nga gikahatag sa mga magtutudlo diha sa komunidad sanglit sila ang sukaranan sa kaalam o kahibalo sa katawhan nga gane nakapahimo pa nga gamhanan, inila ug halangdong individual sa uban diha sa katilingban.
Giila nga usa ka hero o bayani ang mga magtutudlo gumikan sa kamahinungdanon sa ilang serbisyo partikularmente sa pag-umol sa kaugmaon sa usa ka tawo, sanglit sila ang nahimong instrumento sa kaalam sa matag usa nga diin maoy nakahatag ug kalamboan sa komunidad,
Gane usa si Governor Hermie Ramiro ang mipadayag og pagsaludo sa ilang pagkabayani.
subay niini,malipayong mipadangat si Medelyn Pagasian usa ka magtutudlo sa Caluya Elementary School sa iyang pasalamat ngadto ni Governor Hermie Ramiro sa pag- ila o pagsaludo sa gobernadora sa serbisyo nga ilang gihatag sa katilingban, partikularmente sa pag-umol sa maayong mga kaugmaon sa kabataan pinaagi sa pagtudlo niini diha sa mga tunghaan.
Sumala pa ni Pagasian nga nakapalipay nilang mga magtutudlo ang pagdayeg sa gobernadora sa bayanihong serbisyo nga ilang nahatag sa mga kabataan.
Gidason usab ni Bless Sun usa gihapon ka magtutudlo sa Caluya Elementary School nga dako kaayo ang ilang pasalamat sa pag ila ni Governor Hermie Ramiro sa ilang gihatag nga serbisyo sa kumunidad sanglit nakapadasig pa kini kanila sa pagpadayon sa ilang pagtudlo sa kabataan.
MEDICAL AND DENTAL MISSION NI GOVERNOR HERMIE RAMIRO SA BARANGAY CALUYA UG BARANGAY MANLA GIPASALAMATAN SA KATAWHAN
Gipasalamatan pag ayo sa katawhan sa duha ka halayo ug suok nga barangay sa lungsod sa Sapang Dalaga ang pagbisita sa ni Governor Hermie Ramiro sa ilang barangay bisan pa man sa kagamay ug kalayo pa niini.
Alang sa katawhan sa Barangay Caluya ug Barangay Manla nga dakong grasya ang pagbisita ni Governor Ramiro uban sa iyang Medical and Dental Team nga mihatag sa ilang libring medical nga serbisyo ngadto sa katawhan sa nasangpit nga mga barangay.
Samtang dili lang libring medical check- up ug ibot sa mga daot nga ngipon, pagapanghatag og mga vitamins ug tambal ang grasya nga gipasalamatan sa katawhan kon dili gipasalamatan usab nila ang pagpang-apod-apod sa gobernadora sa mga bugas.
Sumala pa sa mga barangay kapitan sa duha ka barangay nga dili matukib ang ilang kalipay sanglit unang higayon pa lamang nga adunay usa ka gobernador nga nakabisita sa ilang barangay nga diin nagdala usab kini og mga kaayuhan alang kanilang mga katawhan.
Giisip sa katawhan sa nasangpit nga mga barangay nga usa ka hulog nang langit si Governor Hermie Ramiro, sanglit ang gobernadora mismo ang midala sa tubag sa ilang mga panginahanglanon partikularmente sa panglawas.
Alang ni Medelyn Pagasian nga usa ka dakong oprtunidad sa katawhan sa ilang barangay ang gidala nga Medical and Dental Outreach Mission ni Governor Ramiro sa ilang barangay sanglit sa kadugay nang panahon sa iyang pagserbisyo isip magtutudlo sa tunghaan sa Barangay Caluya karon pa lamang sila nakadawat og medical mission nga diin nakatabang kini og dako sa katawhan ilabina sa kabataan.
GOVERNOR HERMIE RAMIRO MIPASALAMT UG MIHANGYO SA TANANG LIDERES SA PROBINSYA SA PAGPAKIGHIUSA ALANG SA KALAMPUSAN SA PAGSAULOG SA IKA-82 KA ANIBERSARYO SA PROBINSYA SA MISAMIS OCCIDENTAL UG SA PAS’UNGKO S’G MIS OCC 2011
Dako ang kapilapay ni Governor Hermie Ramiro sa nakitang all out support sa mga kaubanang opisyales sa probinsya, nga empleyado sa Provincial Government , sa mga Lokal Tourism Officers ug sa uban pang bisita atol sa pagpahigayon sa opening ceremony sa mga kalihukan sa pagsaulog sa ika-82 ka anibersaryo sa Probinsya sa Misamis Occidental kagahapong adlawa samay capitol ground.
Sumala pa sa gobernadora nga ang maong pagsuporta ang makapahimong malampuson sa ipahigayong kasaulugan sa 82nd Provincail Anniversary ug sa pagpahigayon sa 2nd Pas’ungko S’g Mis. Occ. 2011
Gipasabot sa gobernadora nga ubos sa iyang pagdumala sa probinsya iyang gipaningkamotan nga mahimong sadya ug malampuson ang pagsaulog sa ikaduhang Pas’ungko S’g Mis. Occ 2011 sama sa nahitabo sa unang pagsaulog sa Pas’ungko S’g Mis. Occ. 2010, nga diin bisan paman sa mga kakulangon niini apan nahimo kining malampuson gumikan sa hiniusang suporta ug kooperasyon sa mga kauban niyang opisyales sa probinsya, ug sa katawhan sa matag syudad ug lungsod.
Subay niini, gipanghinaot ni Governor Hermie Ramiro nga mas mapalig-on pa ug mapalapad ang kooperasyon ug suporta sa tanan aron mas magmalampuson ang mga kalihukan nga ipahigayon atol sa pagsaulog sa ika-82 nga anibersaryo sa probinsya ug sa pagsaulog sa ikaduhang Pas’ungko S’g Mis. Occ. 2011 alang sa kalamboan usab sa probinsya sa Misamis Occidental.