TM BALITA
OCT. 31, 2011
HEADLINES:
BARANGAY KAPITAN SA BARANGAY SIXTO VELEZ MIPASALAMAT SA MEDICAL MISSION NGA GIHATOD NI GOVERNOR HERMIE RAMIRO SA IYANG BARANGAY
KATAWHAN SA BARANGAY GUINABOT SAPANG DALAGA MISAMIS OCCIDENTAL, MIPASALAMAT SA PAGBISITA UG PAGDALA NI GOVERNOR HERMIE RAMIRO SA MEDICAL AND DENTAL OUTREACH MISSION SA ILANG BARANGAY
PAGBISITA UG PAGDALA NI GOVERNOR RAMIRO SA MEDICAL AND DENTAL MISSION SA BARANGAY MEDALLO SAPANG DALAGA, GIKAHINANGOP SA MGA TAGA-BARANGAY MEDALLO
GOVERNOR RAMIRO MIPASALAMAT NGA NAKABISITA SA BARANGAY SIXTO VELEZ SA LUNGSOD SA SAPANG DALAGA
SEGURIDAD SA TANANG MGA PUBLIC CEMETERY SA TIBUOK PROBINSYA HIGPIT NANG GIPATUMAN SA KAPOLISAN
NOVIEMBRE 2, 2011 GIDEKLARAR SA KAGAMHANANG PROBINSYAL SA MISAMIS OCCIDENTAL NGA USA KA NON-WORKING DAY
DETALYE:
BARANGAY KAPITAN SA BARANGAY SIXTO VELEZ MIPASALAMAT SA MEDICAL MISSION NGA GIHATOD NI GOVERNOR HERMIE RAMIRO SA IYANG BARANGAY
Dako ang pasalamat ni barangay kapitan Mario Sabado sa personal nga paghatod ni Governor Hermie Ramiro sa Medical and Dental Mission alang sa katawhan sa iyang barangay.
Sa gihatod ni Governor Ramiro nga medical and dental mission sa iyang barangay, nakapalipay kini pag ayo sa iyang katawhan sanglit nakapahimulos sila sa libring medikal nga serbisyo ug mga libring tambal nga sarang magamit sa ilang mga balatian.
Sumala pa sa kapitan nga lisod ang kahimtang sa katawhan sa Sixto Velez ilabina sa natad sa panginabuhi sanglit pagpanguma,ug pagpamuo ang kasagarang gikabuhian niini, gane ang uban misulod nalang sa pagkacafgu aron makatrabaho ug makatabang sa pamilya, hinungdan nga dakong suliran kung may magkasakit sa pamilya gumikan sa ka walay igong tigom nga kuarta aron ikapacheck up o ikapalit sa tambal.
Gipadayag usab sa kapitan nga iyang hangyuon ang gobernadora sa pagtabang kanila, ilabina sa mga suliran sa barangay sama sa guba nga barangay road, ka walay health center ug dugang tangke sa ilang water system aron sa ingon mapalapad ang serbisyo sa tubig sa tibook barangay.
Malaumon si Kapitan Sabado nga mahatagan gayod sila sa ayuda ni Governor Ramiro aron mapalambo ang ilang barangay.
==
KATAWHAN SA BARANGAY GUINABOT SAPANG DALAGA MISAMIS OCCIDENTAL, MIPASALAMAT SA PAGBISITA UG PAGDALA NI GOV. RAMIRO SA MEDICAL AND DENTAL OUTREACH MISSION SA ILANG BARANGAY
Dakong kalipay ang gibati sa katawhan sa Barangay Guinabot sa ilang pagkasayod ug ilabina gayod sa dihang ila nang nakita ang presensya ni Governor Hermie Ramiro atol sa pagbisita sa gobernadora uban sa iyang Medical And Dental Tream sa nasangpit nga barangay.
Sumala pa ni Barangay Kagawad Lito Caay nga unang higayon pa lamang nga nahitabo nga adunay gobernador sa probinsya nga nakaduaw ug nagdala sa Medical Mission sa ilang barangay ug kini mao lamang si Governor Hermie Ramiro.
Ang paghatod sa gobernadora sa Medical and Dental Mission sa nasangpit nga barangay ang gipasdalamatan pag ayo ni Caay, sanglit nahatagan sa tubag ang suliran sa katawhan sa ilang barangay sa natad sa panglawas sama sa health check up, mga vitamins, tambal ug pagpaibot sa mga daot nga ngipon.
Gipadayag usab ni Konsehal Caay ang ilang hangyo ngadto ni Governor Ramiro nga kahatagan unta sila sa mga ayuda alang sa panginahanglanong proyekto sa ilang barangay sama sa water system nga mao gayod ang mas labing gikinahanglan sa katawhan, daycare center nga kahugnuon na, ug ang ilang barangay office nga wala pa mahuman.
Gitinguha nila nga maayudahan ang maong mga proyekto aron sa ingon makahatag kini sa hapsay nga serbisyo sa katawhan.
Sama sa ubang barangay malaumon ang katawhan sa barangay guinabot ni govenor ramiro nga kahatagan og ayuda ang ilang mga panginahanglanong proyekto sa barangay.
==
SEGURIDAD SA TANANG MGA PUBLIC CEMETERY SA TIBUOK PROBINSYA HIGPIT NANG GIPATUMAN SA KAPOLISAN
Sugod karong adlawa, nakakatag na ang tibuok operatiba sa kapolisan sa tibuok probinsya aron i-mintinar ang kahimtang sa kahapsay ug kalinaw labina niadtong mga public cemetery alayon niining paghinumdum sa adlaw sa mga patay.
Gilauman nga mas dasok karon ang katawhan nga modu-aw sa lubong sa ilang mga mahal sa kinabuhi nga mipanaw gumikan kay taas ang higayon nga masud-ong sa tagsa-tagsa ang ilang mga pamilya bunga sa long weekend ug hiniusa kining modu-aw sa mga lubong.
Subay sa direktiba nga gipatuman sa nasudnon nga pulisiya, aduna gayu’y mga kahimo-an nga guidili sulod sa sementeryo, sama sa pagdala og mahait nga mga hinagiban, pagdala sa mga ilimnon nga makahubog, pag-video-k ug labina na ang paghupot sa ihalas nga mga armas.
Kini higpit nga gipatuman sa kapolisan aron sa tuyo nga linaw ug luwas nga mamauli ang mga kaegsuonan sa ilang tagsa-tagsa ka mga panimalay.
Gawas sa pagmonitor sa mga kapolisan labina sa mga nana-unang sementeryo sa tibuok probinsya gikan sa mga syudad ug munisipalidad, aduna usay regular nga checkpoint ang gihimo sa kapolisan sa mga national highway.
Ang OPLAN Kaluluwa nga gipatuman sa kapolisan, molungtad kini hangtud nga wala nay makita nga mga kaegsuonan nga miduaw sa mga lubnganan.
NOBYEMBRE 2, 2011 GIDEKLARA NGA USA KA SPECIAL NON WORKING DAY ANG PROBINSYA SA MISAMIS OCCIDENTAL
Sa tuyo nga mahatagan ug kahigayonan ang mga katawhan ning probinsya nga makasilibrar ug makapartisipar sa mga kalihukan, nagduso ug usa ka resolution ang mga sakop sa Sangguniang Panlalawigan pinaagi sa pagpanguna ni Board Member Lovely Liezl Yape sa 1st District Sa Misamis Occidental ngadto sa Office of the President Benigno Noynoy Aquino 111, naghangyo nga ang petsa 2 sa bulan sa Nobyenbre usa ka Special Non Working Day.
Adtong Octobre 21, 2011 nadawat sa sangguniang panlalawigan ang usa ka fax gikan sa Office of the President nga ang unod niini mao ang Proclamation No. 274 pinaagi ni Executive Secretary Paquito Ochoa Jr. Nga nagdiklara nga ang nobyembre 2, 2011 usa ka Special Non Working Day alang sa Probinsya sa Misamis Occidental.
Niini, nalipay ug dako si Governor Hermie Ramiro gumikan kay mahatagan na gayod unya ug pagtamod ingon man pagtagad sa mga Misamisnon ang pagkamugna sa Misamis Occidental isip usa ka probinsya.
Kahinumduman nga pinaagi sa Legislative Act No.3537 nga gipasar adtong November 2, tuig 1929 gibahin ang Probinsya sa Misamis sa duha nga mao ang Misamis Oriental ug Misamis Occidental gumikan sa ka kulang sa geographical contiguity niini.
Ang Misamis Oriental adunay 22 ka mga Municipalidad ug 3 ka Ciudad, samtang ang Misamis Occidental adunay 14 ka Lungsod ug 3 ka Ciudad.
Nasayran nga ang Nobyembre 2, 1929 mao ang opisyal nga petsa diin ang Probinsya sa Misamis Occidental namugna.