TM BALITA
OCT. 04-11
HEADLINES
GOVERNOR RAMIRO NAKADAYEG SA UNANG PERFORMANCE SA FIRST CHORAL GROUP SA KAGAMHANANG PROBINSYAL
GOVERNOR RAMIRO LARAW’NG MAGMUGNA OG USA KA KOMITEBA NGA MAGSUBAY SA PERFORMANCE SA MGA EMPLIYADO SA KAPITOLYO
PROBINSYA SA MISAMIS OCCIDENTAL DAKO PA OG KAHIGAYONAN NGA MOLAMBO ANG TURISMO UG EKONOMIYA MATUD PA NI PROVINCIAL TOURISM CHAIRMAN GERARD HILARION RAMIRO
DETALYE SA MGA BALITA:
GOVERNOR RAMIRO NAKADAYEG SA UNANG PERFORMANCE SA FIRST CHORAL GROUP SA KAGAMHANANG PROBINSYAL
Kun’ nakadayeg ang gobernadora sa unang pag-perform sa pinakaunang choral group nga namugna sa kapitolyo atol sa Flag Raising Ceremony kagahapon, unsa pa kaha kun’ mabansay pa kini pag-ayo.
Nasayran nga gitahasan ni Governor Hermie Ramiro si atty. Ricardo Lomantas, ang Provincial Legal Council sa kapitolyo aron maoy mopili niadtong mga empliyado nga adunay talento sa pag-awit ug pagpangita sa usa ka musician nga maoy mamahimong conductor sa gimugnang Provincial Choral Group.
Sa kasaysayan sa pangagamhanang probinsyal sa Misamis Occidental, sa administrasyon pa lamang ni Ramiro nga adunay ingon niini nga kahimo-an.
Gipaninguha sa gobernadora nga aduna gayuy kaugalingong choral group ang kapitolyo aron adunay promal nga presentasyon ang probinsya sa higayon nga adunay mga nagkadaiyang kalihukan ang kapitolyo.
Gawas sa gimugnang choral group, karong pipila ka mga adlaw, modangat usab ang set sa mga music instrument alang mugna-ong music band sa kapitolyo.
GOVERNOR RAMIRO LARAW’NG MAGMUGNA OG USA KA KOMITEBA NGA MAGSUBAY SA PERFORMANCE SA MGA EMPLIYADO SA KAPITOLYO
Gilauman nga karong pipila ka mga adlaw, aduna nay matukod nga komiteba ang kagamhanang probinsyal nga maoy motan-aw sa lihok sa tanang lokal nga mga empliyado sa kapitolyo.
Kini ang sunod nga aksyon nga gihimo sa kagamhanang probinsyal pinaagi sa pagpanguna ni Governor Herminia Ramiro human miguwa ang resulta sa gihimong ebalwasyon sa Civil Service Commission ngadto sa tanang empliyado sa kapitolyo gikan sa mga nagkadaiyang departamento.
Sa high potential and high performance-40, low performance and low potential-43, high potential with average performance-91, high potential with low performance-5, average potential with high performance-73, average performance with average potential-377, low potential but average performance-75, low performance with average potential-92 ug high performance with low potential-6.
Ang nasangpit nga evaluation, basi kini sa 802 ka regular nga empliyado sa kapitolyo nga gilangkoban sa 19 ka mga local offices.
Sa ipatuman nga balaod ni Governor Ramiro kalabot sa higpit nga pagsusi sa nahimong performance sa mga empliyado, posible nga mo-ani gayud kini og negatibong impresyon labina niadtong mga kawani nga dili na kaayo epektibo sa ilang mga trabaho.
Apan subli nga mipasidaan ang gobernadora nga sa unang tuig pa lamang sa iyang pag-alagad isip gobernador sa probinsya, naglakip na ang pagtan-aw sa nahimong kalihukan mismo sa mga empliyado sa kapitolyo.
Buot masayran sa katawhan nga ang kagamhanang probinsyal, higpit usab nga nagpatuman sa mga balaod mismo sa kaugalingong nataran gumikan kay bahandi gihapon ang sa katawhan ang gidawat nga sweldo sa mga empliyado.
Busa kinahanglan gayud nga bugti-an usab ang katawhan sa tataw ug matinud-anon nga pagserbisyo.
PROBINSYA SA MISAMIS OCCIDENTAL DAKO PA OG KAHIGAYONAN NGA MOLAMBO ANG TURISMO UG EKONOMIYA MATUD PA NI PROVINCIAL TOURISM CHAIRMAN GERARD HILARION RAMIRO
Mas taas na unta og naabtan ang Probinsya sa Misamis Occidental sa natad sa turismo ingon man sa kahimtang sa ekonomiya sa probinsya.
Kini human wala nahatagi og pagtagad ang nasangpit nga mga programa sa mga nanglabay’ng katuigan nga maoy dakong hinungdan nga naulahi ang Misamis Occidental sa kalambo-an kon itandi sa mga silingang probinsya partikular sa northwestern mindanao region.
Apan gipanghimatuod ni Provincial Tourism Chairman Gerard Hilarion Ramiro nga dili pa ulahi ang tanan, duna pay kahigayonan nga mas mahimo pang progresibo ang probinsya labina sa turismo ug lakip na ang ekonomiya.
Dili lisod ibaligya ang misamis occidental gumikan kay ang ani-a usab sa probinsya ang mga nagkadaiyang tourist attraction nga wala sa ubang probinsya.
Kun’ sa natad usab sa economic activity, potential usab ang Misamis Occidental gumikan kay dili kaayo sentro ang probinsya sa mga natural disaster nga maoy nag-unang babag sa pagpalambo sa negosyo.
Gawas niana, malinawon usab ang kinatibuk-ang kahimtang sa probinsya nga mao usay gibasihan sa mga investor nga mosalig sila sa pagbutang og negosyo sa usa ka dapit.
Gani bisan sa kabag-o pa sa mga kalihukan nga gipasayon sa kagamhanang probinsyal pinaagi sa pagpanguna ni Governor Hermie Ramiro, nakatampo na og dakong tabang sa turismo ug panginabuhian sa mga taga-misamisnon.
Usa na niini ang First Pas’ungko Festival 2010 atol sa 81st Provincial Charter Anniversary ug pag-sponsor sa probinsya sa gipahigayon nga Pasundayag 2011 sa mall of asia niadtong bulan sa abril.
Wala himo-ang babag sa Provincial Tourism Chairman ang suliran sa panudlanan gumikan kay ang sama niini nga programa, usa kini ka ang-ang nga mopadulong na sa hingpit nga paglambo ang probinsya sa Misamis Occidental.