TM BALITA
SEP. 29-11
HEADLINES
PAMILYA SA NAKABSAN UG NASAMDAN NGA MGA POLICE OFFICER SA OZAMIZ CITY PNP POSIBLENG MAKADAWAT OG AYUDANG PINANSYAL GIKAN SA KAGAMHANANG PROBINSYAL
KAHIMTANG SA KAHAPSAY UG KALINAW SA PROBINSYA PAKISAYRAN SA SANGGUNIANG PANLALAWIGAN
MINILYON NGA SOLAR ENERGY PROJECT GIKATAKDA NGA IBUTANG SA BARANGAY LANGUB, CALAMBA
NATIONAL IRRIGATION ADMINISTRATION PLANONG MOPALAPAD OG 150 EKTARYAS NGA BASAKAN SA BARANGAY LANGUB, CALAMBA SA SUNOD TUIG
DETALYE SA MGA BALITA:
PAMILYA SA NAKABSAN UG NASAMDAN NGA MGA POLICE OFFICER SA OZAMIZ CITY PNP POSIBLENG MAKADAWAT OG AYUDANG PINANSYAL GIKAN SA KAGAMHANANG PROBINSYAL
Posible nga adunay madawat nga ayudang pinansyal ang pamilya sa namatay nga si SPO3 Edison Zanaga ug ang kauban niini nga nasamdan nga si Police Officer Sumagang nga managsamang biktima sa pagpusil niadtong miaging simana sa Barangay Pulot, Ozamiz City.
Kini human gipadangat ni Board Member Morpheus Agot atol sa gipahigayon nga Special Session sa Sangguniang Panlalawigan niadtong miaging simana.
Matud pa ni Board Member Agot nga angay lamang hatagan og ayuda ang pamilya sa mga biktima isip pag-ila sa nahimong papel sa pagpatunhay sa kahapsay ug kalinaw sa dapit nga ilang gialagaran.
Hinuon dili mahibalo-an kun’ unsa nga tukmang adlaw nga madawat sa pamilya ni Police Officer Edison Zanaga ug mismo ni Police Officer Sumagang ang financial assistance gikan sa kagamhanang probinsyal gumikan kay moagi pa kini sa legal nga proseso usa mareles ang gipasalig nga ayuda.
Kahinumduman nga nadala pa sa tambalanan si zanaga human kini naigo sa mga bala sa dihang miresponde sila sa usa ka barangay konsehal sa Pulot nga gikatahong nag-wild sa maong dapit ug sa samang insidente samdan usab si simagang sa dihang naigo kini sa paa nga bahin niadtong miaging simana.
KAHIMTANG SA KAHAPSAY UG KALINAW SA PROBINSYA PAKISAYRAN SA SANGGUNIANG PANLALAWIGAN
Buot masayran sa mga sakop sa sangguniang panlalawigan kun’ unsa na gayud ang tukmang kahimtang sa peace and order karon sa tibuok probinsya.
Kini bunga sa pipila ka mga nahitabong krimen sa probinsya, usa na niini ang mga insidente sa pagpamusil patay sa Ozamiz City.
Gusto lamang sa mga magbabalaod nga maimbestigahan sa mga otoridad ang maong mga insidente sa dili pa kini mograbe.
Gawas niini, buot usab masayran sa mga SB Member ang kahimtang sa insugency sa tibuok probinsya.
MINILYON NGA SOLAR ENERGY PROJECT GIKATAKDA NGA IBUTANG SA BARANGAY LANGUB, CALAMBA
Problema sa nagkataas ug nagkamahal nga balayrunon sa kurente ang kasagarang mulo sa katawhan sa bisan asang dapit sa pilipinas.
Ning umaabot nga mga adlaw, maingon ta nga swerte ang usa sa mga barangay sa probinsya sa Misamis Occidental.
Gumikan kay adunay nakatakda nga usa ka dakong proyekto sa nasyonal nga Solar Energy Project ang ipahimutang sa Barangay Langub sa Lungsod Sa Calamba, Misamis Occidental.
Matud pa ni Mayor Luisito Villanueva Jr. Nga ang katumanan sa maong proyekto makahatag sa daghang oportunidad sa katawhan sa Barangay Langub, sa Lungsod Sa Calamba ug sa mga kasilinganang dapit nga makatrabo niini.
Mipadayag usab si Governor Ramiro sa iyang pasidungog sa maong barangay gumikan sa maong project.
Gane mipasiaw pa ang gobernadora nga kon matuman na ang maong proyekto mohimo siya og balay sa Barangay Langub ug dinhi na siya manimuyo.
NATIONAL IRRIGATION ADMINISTRATION PLANONG MOPALAPAD OG 150 EKTARYAS NGA BASAKAN SA BARANGAY LANGUB, CALAMBA SA SUNOD TUIG
Laing dakong proyekto gikan sa nasyonal ang maangkon sa Barangay Langub, Calamba, Misamis Occidental og kini mao ang pag-expand sa 150 ka ektaryang basakan sa maong barangay.
Atol sa Medical and Dental Outreach Mission nga gipahigayon ni Governor Hermie Ramiro sa Barangay Langub niadtong adlawng milabayng adlawng Martes Septiembre 22, 2011.
Gipadayag ni Mayor Luisito Villanueva Jr. Ngadto sa katawhan sa maong barangay, nga ang buhatan sa National Irrigation Administration ang mopalapad sa mga basakan sa Barangay Langub, sa gilapdon nga 150 ektaryas.
Subay niini nga proyekto, mipangat si Mayor Villanueva sa iyang hangyo ni Governor Ramiro nga maohulam sa buldoser sa probinsya ang lungsod sa Calamba aron ikabuldos sa mga luna nga himoong basakan, sanglit kalubian kini.
Pinaagi unya niini nga proyekto dili na maglisod pa sa supply sa bugas ang probinsya sanglit usa na unya sa tigsupply sa bugas ang Barangay Langub dinhi sa Misamis Occidental.