Tm balita
Sep. 13-11
Headlines
Kagamhanang lokal sa Plaridel nagsaulog sa ilang kapistahan
Suportang pinansyal ni Governor Ramiro sa lungsod sa Plaridel gipasalamatan sa LGU
Search for Miss Tangub City Tourism 2011 gisugdan na sa kagamhanang lokal sa Tangub
Bag-ong mountain resort sa Brgy. Simasay, Tangub City gipasigarbo sa LGU
Obligasyon sa mga beneficiaries sa 4ps subling gipahinumdom sa DSWD
Pagselebrar sa unang National Disability Prevention and Rehabilitation Culmination provincial level sa Misamis Occidental, gikalipay pag ayo sa mga person with disabilities
Detalye sa mga balita:
Kagamhanang Lokal Sa Plaridel Nagsaulog Sa Ilang Kapistahan
Gitawag sa kagamhanang lokal sa lungsod sa Plaridel nga ang 2011 fiesta celebration maoy pinakasadya ug pinakamakasaysayanon nga fiesta celebration nga nahitabo sa ilang lungsod.
Kini human gitapos sa lgu ang serye sa mga kalihukan niadtong adlaw’ng sabado nga gipahinungod ni san nicolas de tolentino ang patron sa mga hayop, mga bata ug mga mananagat.
Matud pa ni mayor agnes villanueva nga wala siya magto-o nga ingon niadto kasadya ug kabibo ang selebrasyon kini bisan pa man sa kalimitado sa panudlanan sa lungsod alang sa mga nagkadaiyang kalihukan.
Naglakip na niini ang mga nagkadaiyang sports competition, ang search for miss hiyas 2011 ug ang pinakabag-ong gipasiugda nga kompetisyon mao ang invitational cheer dance competition.
Nagkanayon ang mayora nga pinaagi diay sa pagsuporta ug pagtinabangay sa katawhan alang sa bisan unsang mga programa, magmalampuson gihapon kini taliwala sa nasinating kalisud.
Suportang pinansyal ni Governor Ramiro sa lungsod sa Plaridel gipasalamatan sa LGU
Wala magdahom ang katawhan sa lungsod sa plaridel nga nakig-uban sa pagtapos sa fiesta celebration niadtong sabado nga ilang makita og personal si governor herminia ramiro sa labing unang higayon atol sa kapistahan.
Gawas nga ilang nasaksihan ang gobernadora atol sa kahulogan, gikalipay usab nila pag-ayo human nila nadungog ang pasalig sa gobernadora nga sa dili madugay, madawat na sa mga barangay kapitan ang tag-50 mil pesos nga financial assistance alang sa bisan unsang gikinahanglan sa barangay.
Masipang pakpak usab ang gibuhi-an sa mga local officials human niini nadungog gikan sa gobernadora nga gihanan usab niya ang lgu og kapin sa usa ka milyon kapesos alang sa bisan unsang pagpalambo usab sa lungsod.
Gikalipay usab sa katawhan human niini nadungog nga ang lungsod sa Plaridel na usab ang hatdan sa programang dental ug medical sa gobernadora karong pipila ka mga adlaw.
Gidayeg usab sa gobernadora ang nakitang kalambo-an karon sa lungsod sa Plaridel.
Search for Miss Tangub City Tourism 2011 gisugdan na sa kagamhanang lokal sa Tangub
Pormal gilayong gipresentar sa kagamhanang lokal sa Tangub City ang napulo’g duha ka mga maanyag nga official na nga mga kandidata alang sa search for Miss Tangub City Tourism 2011.
Gipresentar sa publiko ang dose ka mga candidates, atol sa gipahigayon nga alay lakad 2011 niadtong septembre 9 alas-tres sa hapon human gipahigayon ang deadline sa rehistrasyon sa mga kandidata niadtong agusto 13.
Niadtong adlaw’ng dominggo, sunod nga gipahigayon ang pagpili sa mamahimong choice of the media kon diin nianang adlawa, giimbitar sa lgu ang mga local media labina sa Ozamiz City aron pasiunang hashasan ang mga kandidata alang sa maong kategorya.
Karong septembre 21, gikatakda nga ipahigayon na usab ang talent competition night ug sa septembre 24 mao na ang coronation night.
Gawas sa search for Miss Tangub City Tourism 2011, aduna pa’y ipahigayon nga search for dalit festival queen, dalit festival street dancing ug showdown.
Kini nga kapistahan, gipahinungod sa lgu sa ilang patron nga si San Miguel de Arkanghel
Bag-ong mountain resort sa Brgy. Simasay, Tangub City gipasigarbo sa LGU
Dinhi napamatud-an sa kagamhanang lokal sa Tangub City nga dili tanang butang sa kalibotan nga eksklusibo lamang mahimo sa mga adunahan.
Kini human makita sa mga official sa maong syudad, usa na niini si first lady Jennifer Tan ang daw maindig sa mahalon nga mga resort sa nasud ang swimming pool nga ana-a makita sa barangay simasay nga gipanag-iya sa pamilyang roma.
Matawag nga medyo lisud alang sa mga kaegsuonan nga walay kaugalingong sakyanan gumikan sa kadistansya sa maong tourist destination gikan sa sentrong bahin sa syudad o kaha sa national highway.
Apan kun’ antoson lamang sa mga kaegsuonan nga nangandoy og relaxation ang maong resort maoy solusyon.
Gani, ang roma swimming pool maoy nahimong venue sa gipahigayong pictorial ug search for media’s choice niadtong dominggo, alang sa search for Miss Tangub City Toursm 2011.
Mipanghimatuod usab ang pamilyang roma nga bisan sila, wala magdahom nga ingon niini ang naabot sa ilang resort.
Kini ilang gimugna aron maoy himuong tapukanan sa mga miembro sa pamilya sa higayon nga adunay okasyon bunga usab sa gibiling mensahe sa ilang guinikanan nga bisan wala na sila, ipabilin ang lig-ong paghugpong ug paghinigugmaay sa nahibiling mga anak.
Obligasyon sa mga beneficiaries sa 4ps subling gipahinumdom sa DSWD
Subling gipahinumduman sa taga-dswd ang mga beneficiaries sa programang 4p’s sa pagtuman sa ilang mga obligasyon sumala sa kontrata nga ilang gilagdaan sa 4p’s program.
Kahinumduman nga ang mga pamilya nga nahimong beneficiaries sa 4p’s ang milagda sa kontrata tali sa maong programa nga diin nagasaad nga andam silang motuman sa pagpaeskuyla ug pagpamentenar sa kahimsog sa panglawas sa ilang mga anak pinaagi sa regular niining pagbisita sa mga health center sa matag bulan diha sa ilang dapit.
Sumala pa ni Provincial Social Welfare and Development Director Rosendo “tibo” Requina, nga iyang gipanghinaut nga dili unta sayangon ug hatagan gayod sa bili ang opotunidad nga gihatag sa gobyerno ngadto sa mga 4p’s beneficiaries, sanglit dili hangtod sa hangtod ang maong pribilihiyo kon dili limitado lamang ang panahon niini.
Gidugang pa sa director nga kung ang tanang beneficiaries ang magatuman gayod sa ilang mga obligasyon diha sa maong programa, dako ang posibilidad nga makab ot ang tinguha o adbokasiya sa pangagamhanang national, provincial ug lokal nga mawala ang malnutrisyon sa kabataan ug mawalausab ang mga illeterate nga kabataan sanglit ang maong programa nagatumong man sa pagpatungha ug pagmentenar nga himsog ang kabataan.
Pagselebrar sa unang National Disability Prevention and Rehabilitation Culmination provincial level sa Misamis Occidental, gikalipay pag ayo sa mga person with disabilities
Dili sayon ug dili lalim ang kinabuhi sa usa ka differently abled person kon tawong baldado sanglit kasagaran nila ang anaa lamang sa panimalay ug dili exposed sa komunidad, bugtong ang mga kapamilya lamang nila ang ilang kasagarang ikauban ug ikasulti-sulti, ug kini nga sitwasyon ang gihatagan ug dakong pagtagad ni Governor Hermie Ramiro.
Hinungdan nga niadtong milabayng hulyo 26, ning tuig 2011 mimando ang gobernadora sa buhatan sa pswd sa pagselebrar sa National Disability Prevention and Rehabilitation kon NDPR provincial level nga diin gishoulder sa iyang buhatan ang gasto niini.
Subay niini, gibutyag ni Marichu Tijing ang Administrative Officer sa Misamis Occidental Provincial Medical Rehabilitation Center nga ang maong mandato sa gobernadora ang ilang gikalipay sanglit unang higayon nga ilang kahatagan ang hut ong sa mga differently abled person sa kahigayunan nga hiniusang magkatigom sa usa ka okasyon ug mahimamat ang ilang mga kauban nga susama usab nila ug mga kahimtang.
Ug kung gikalipay man sa mga nagdumala sa maong institution ang maong kahigayunan, mas dako ang kalipay nga gibati sa mga person with disabilities sa maong okasyon sanglit nahimamat nila ang uban pang susama nila ug sa samang paagi napakita usab nila ang ilang mga tinaguang talento.