TM BALITA
JUN. 20-12
HEADLINES
KINANGAY SUR AGRARIAN REFORM COMMUNITY MULTI-PURPOSE COOPERATIVE MALAUMON NGA MAKAKAPLAG PA SILAG DUGANG PUNDO ALANG SA PAGPALAMBO SA ILANG KOOPERATIBA
DEPARTMENT OF AGRARIAN REFORM USA SA MGA NATIONAL AGENCY SA PROBINSYA NGA ADUNAY DAGHANG NATABANG SA MGA RURAL COMMUNITY
PAGBAG-O SA HULAGWAY SA KWARTA USA KA PAAGI NGA MALIKAYAN ANG PAGKUYANAP SA MGA PEKENG SALAPI
REMITTANCES SA MGA OVERSEAS FILIPINO WORKERS USA SA NAKATABANG NGA WALA KAAYO MI-EPEKTO ANG FISCAL CRISIS NGA NASINATI SA MGA ADUNAHANG NASUD
KAGAMHANANG LOKAL SA DAKBAYAN SA OZAMIZ PADAYONG NANGANDAM ALANG SA 64TH CHARTER ANNIVERSARY CELEBRATION SA CIUDAD KARONG HULYO
PROVINCIAL DISASTER RISK REDUCTION AND MANAGEMENT COUNCIL PADAYONG NAGPAHINUMDUM SA MGA MISAMISNON NGA MAGBINANTAYON SA DAGAN SA PANAHON KARON
==
DETALYE:
KINANGAY SUR AGRARIAN REFORM COMMUNITY MULTI-PURPOSE COOPERATIVE MALAUMON NGA MAKAKAPLAG PA SILAG DUGANG PUNDO ALANG SA PAGPALAMBO SA ILANG KOOPERATIBA
Wala kawad-i ug paglaum ang mga tagdumala sa Kinangay Sur Agrarian Reform Multi-Purpose Cooperative kon KINSARCO nga makaplag pa sila ug laing tinubdan sa panalapi aron sa tuyo nga madugangan ang ilang kasamtangang pundo.
Matud pa ni Mrs. Salvacion Dula, ang nangulo karon sa KINSARCO nga kun’ nakakuha sila ug pundo sa Department of Agrarian Reform kon DAR nga wala pa sila giila sa Sangguniang Panlalawigan nga usa ka People’s Organization, unsa pa kaha nga accredited na sila.
Unang nakahatag og tabang pinansyal ang DAR gumikan sa seryoso niining tumong nga palambuon ang kooperatiba nga makatabang usab dako una sa katawhan sa Barangay Kinangay Sur ug sa ngadto-ngadto tibuok katawhan sa Clarin ug sa tibuok probinsya.
Sa pagkakaron kamulo na nga gihan-ay sa mga lumilihok sa KINSARCO ang gikinahanglang mga dokumento aron legal nga mapadangat sa mga kadagkoan sa probinsya ang ilang gitinguhang tabang.
Usa sa mga tag-as nga official sa probinsya nga ilang gilauman nga mohatag usab og tabang kanila mao si Governor Hermie Ramiro uban ni Vice Governor Henry Oaminal.
Nahinumduman ni Salvacion Dula nga kaniadtong kongresista pa si Governor Ramiro sa ikaduhang distrito sa Misamis Occidental daghan gayud kini og nahatag nga tabang sa ilang Barangay, mga Infrastructure Project man o Financial Assistance.
==
DEPARTMENT OF AGRARIAN REFORM USA SA MGA NATIONAL AGENCY SA PROBINSYA NGA ADUNAY DAGHANG NATABANG SA MGA RURAL COMMUNITY
Kun’ wala ug to-o ang gihimong paningkamot sa mga National Agency, sama sa DepEd, DA, DSWD, DPWH, NIA, DENR ug uban pa, dili usab palupig ang Department of Agrarian Reform kon Dar.
Dinhi sa Rehiyon Dies partikular sa Probinsya sa Misamis Occidental usa ang dar sa mga national agency nga nanguna nga adunay daghang nahatag nga tabang sa katawhan labina sa mga Rural Community nga dili kaayo maabtan og ayuda sa ubang mga ahensya sa kagamhanan ug sa kagamhanang lokal.
Niining bag-o lamang, ang Kinangay Sur Agrarian Reform Multi-Purpose Cooperative kon KINSARCO sa Lungsod sa Clarin ang ilang nahatagan og ayudang pinansyal isip ipatindog sa building nga maoy himuong Coockies Processing Center sa KINSARCO.
Usa lamang ang KINSARCO sa mga People’s Organization nga nahatagan og ayudang pinansyal sa DAR.
Kahinumduman nga sa milabay nga mga katuigan, daghang mga lungsod sa probinsya ang nahatagan og mga proyekto sa DAR labina sa mga grant gikan sa ubang Nasud.
==
PAGBAG-O SA HULAGWAY SA KWARTA USA KA PAAGI NGA MALIKAYAN ANG PAGKUYANAP SA MGA PEKENG SALAPI
Adunay posibilidad nga sa ngadto-ngadto mahimong maawat sa wala mailang mga malapason ang hulagway sa bag-ong porma sa kwarta nga gipagawas karon sa administrasyon ni presidente benigno s. Aquino iii. Apan kun’ mahitabo man gani kini molungtad pa og dugay.
Gipahayag ni Acting Deputy Director Henry Franial sa Bangko Sentral ng Pilipinas Ozamiz City Branch nga kini ang hinungdan nga nagmugna ang kagamhanan ug New Generation Currency aron dili na makapadayon sa ilang modus operandi ang mga malapason sa mini nga mga salapi basi sa daan nga mga currency.
Samtang magkadugay, aduna gayu’y posibilidad nga maawat ang mga nagkadaiyang bills o kaha mga coins gumikan kay estudyohan nila kini pag-ayo.
Apan bisan pa man awaton sa mga malapason ang mint sa Philippine Currency, dili gihapon kini magmalampuson kun’ abtik ug mabinantayon gayud ang katawhan.
Kini ang usa sa mga tahas nga gihimo karon sa bsp nga mao ang pagpahibalo sa katawhan kun’ unsaon pag-ila ang tinuod ug peke nga kwarta.
Niining bag-ong hulagway sa kwarta nga gipagawas sa BSP, ilang gipaniguro nga dili gilayon kini maawat ug kun’ mahitabo man gani kini, kinahanglan idangop gilayon sa ilang buhatan aron mahatagan dayon nila ug aksyon.
==
REMITTANCES SA MGA OVERSEAS FILIPINO WORKERS USA SA NAKATABANG NGA WALA KAAYO MIEPEKTO ANG FISCAL CRISIS NGA NASINATI SA MGA ADUNAHANG NASUD
Alang kang Acting Deputy Director Henry Franial sa Bangko Sentral ng Pilipinas Ozamiz City Branch nga kun’ aduna may mga Filipino nga pasidunggan, iya gayu’ng pilion ang mga Overseas Filipino Workers.
Kini gumikan sa ilang dakong papel hinungdan nga nagpabiling lig-on ang ekonomiya sa pilipinas bisan pa man sa fiscal crisis nga nasinati sa mga First World Country niadtong 2010.
Matud pa niya nga kun’ siya’y pabut-on, dili na OFW ang ingalan sa mga Filipino nga ato-a sa abroad, hinganlan na kini ug Overseas Filipino Investors.
Gumikan sa ilang mga remittance, kompyansa ang kagamhanang nasyonal nga mobuhi og minilyong pundo pinaagi sa mga proyekto aron sa tuyo nga padayong maglihok ang ekonomiya sa nasud.
Gani ang mga OFW maoy usa sa gitumong sa ilang gilusad nga programa aron adunay kasigurohan ang mga abroad sa angay’ng mapahimuslan nga mga benepisyo.
==
KAGAMHANANG LOKAL SA DAKBAYAN SA OZAMIZ PADAYONG NANGANDAM ALANG SA 64TH CHARTER ANNIVERSARY CELEBRATION SA SYUDAD KARONG HULYO
Taliwala sa kanihit sa panudlanan sa kagamhanang lokal sa dakbayan sa Ozamiz, gipaninguha gihapon sa mga official nga sadya ug makahuloganon ang pagselebrar sa 64th Charter Anniversary nga gamay lamang ug gasto.
Matud pa ni HRMO Officer Jaime Tomada, ang organizer sa serye sa mga kalihukan sa anibersaryo nga ang gihan-ay nga mga kalihukan, subay usab kini sa nauyonan sa mga City Officials sa pagpangulo ni Mayor Nova Princess Parojinog-Echavez.
Dunay duha ka mga aktibidad nga pinaka-highlight sa programa ug mao gayu’y ilang gipangandaman.
Kini mao ang Search for Miss Ozamiz City Tourism 2012 ug ang Subayan Keg Subanen Festival.
Niining simanaha hangtod sa unang simana sa Hulyo dunay nakahan-ay nga mga kalihukan nga may kalabotan ang search una modangat ang Grand Coronation Night nga maoy gikahinaman sa mga kaigsuonan nga mahiligon sa Beauty Contest.
Gilauman usab nga adunay mga Celebrity ug TV Personality ang masaksihan atol sa Grand Coronation Night.
Giawhag usab niini nga ang mga kawani sa Lokal ug Nasyonal nga mga buhatan ingon man mga pribadong establisemento nga moalayon sa kalihukan aron nga mas magbulokon pa ang 64th Charter Anniversary sa Ciudad.
==
PROVINCIAL DISASTER RISK REDUCTION AND MANAGEMENT COUNCIL PADAYONG NAGPAHINUMDUM SA MGA MISAMISNON NGA MAGBINANTAYON SA DAGAN SA PANAHON KARON
Padayon pa karong nakaapekto sa nasud ang Southwest Monsoon o hanging habagat nga maoy hinungdan sa matag karon ug unya nga mga pag-ulan labina sa Luzon ug makasinati usab og mapanganuron nga kalangitan ang pipila ka mga bahin sa Visayas ug Mindanao.
Apan matud pa sa Philippine Atmospheric and Geophysical Services Administration kon PAGASA-DOST, adunay nasigpatan nga Tropical Storm sa amihanan ug kasadpang bahin sa Basco, Batanes kon diin padayon pa karong giobserbahan sa mga eksperto.
Ang Tropical Storm aduna kini International Name nga Talim kon nga kun’ mosulod na kini sa Area of Responsibility sa nasud pagahinganlan na kini ug Tropical Storm Carina.
Gumikan niini, official gilayong mipadangat ug pahibalo ang National Disaster Risk Reduction and Management Council ngadto sa mga rehiyon ug probinsya sa nasud.
Bisan ang Luzon lamang posibleng maapektahan sa maong Tropical Storm sa pagkakaron apan gipahinumduman gihapon ang mga kaegsuonan dinhi sa probinsya nga dili magkompyansa gumikan kay makamugna gihapon kini og mga pag-ulan nga moresulta unya sa mga pagbaha ug landslide.
==