TM BALITA
MAR. 09-12
HEADLINES
LIMA KA MGA BARANGAY SA LUNGSOD SA BALIANGAO PINAKAULAHING MGA BARANGAY NGA NAKAPAHIMULOS SA NAGPADAYONG OUTREACH MISSION NI GOVERNOR HERMIE RAMIRO
GATOSAN KA MGA SIMILYA SA KAHOY NATISOK ATOL SA DUNGAN NGA OPERASYON SA TREE PLANTING SA MGA WOMEN’S ORGANIZATION SA TIBUOK PROBINSYA
55TH IB BATALLION COMMANDER NAGPASALAMAT NI GOVERNOR HERMIE RAMIRO SA SUPORTA SA KASUNDALOHAN
KASUNDALOHAN HUGOT ANG MONITORING SA PEACE AND ORDER SA PROBINSYA
TAG-50 MIL PESOS NGA FINANCIAL ASSISTANCE NI GOVERNOR HERMIE RAMIRO MADAWAT NA USAB SA MGA BARANGAY SA LUNGSOD SA BALIANGAO
PROVINCIAL ROAD MANAGEMENT FACILITY YEAR 2 PROJECT SA TULO KA MGA LUNGSOD SA PROBINSYA POSIBLENG PAGASUGDAN NA NIINING HIGAYONA
PGMO OFFICIALS GIPAILALOM SA MONITORING AND EVALUATION SYSTEM SEMINAR
==
DETALYE:
LIMA KA MGA BARANGAY SA LUNGSOD SA BALIANGAO PINAKAULAHING MGA BARANGAY NGA NAKAPAHIMULOS SA NAGPADAYONG OUTREACH MISSION NI GOVERNOR HERMIE RAMIRO
Laing gatosan na usab ka mga kaigsuonan sa lungsod sa Baliango ang nakapahimulos sa pinakabag-ong Medical And Dental Outreach Mission ni Governor Hermie Ramiro.
Ang Lima (5) ka mga Barangay nga napahigayonan sa unang adlaw sa Outreach Mission, Marso Nuebe mao ang Barangay Punta Miray, Tugas, Northern, Southern ug Barangay Naburos.
Subay sa naandan, ana-a gayud ang presensya ni Governor Hermie Ramiro nga linawas gayud nga nakighimamat sa katawhan atol sa kalihukan uban ang mga Doktor, Nurses, Pharmacist, Dentists, Midwives ug mga BHW.
Atol sa unang adlaw sa Outreach Mission, ana-a usab ang presensya nila ni Mayor Svetlana Jalosjos-De Leon, mga Sangguniang Bayan Member pinangulohan ni Vice Mayor Jojo Yap ug mga Barangay Officials sa matag barangay.
Ang nasangpit nga programa sa gobernadora, gipasalamatan pag-ayo sa mga kaegsuonan labina niadtong nakapahimulos.
Gilauman nga mas daghan pa ang mga kaigsuonan nga makatagamtam sa nagpadayong programa sa maayong panglawas sa gobernadora gumikan kay tulo kaadlaw ang maong kalihukan sa maong lungsod diin ang unang hugna matapos karong Adlaw’ng Sabado.
==
TAG-50 MIL PESOS NGA FINANCIAL ASSISTANCE NI GOVERNOR HERMIE RAMIRO MADAWAT NA USAB SA MGA BARANGAY SA LUNGSOD SA BALIANGAO
Mipadayag sa ilang gibating kalipay ug pagpasalamat ang mga kaegsuonan labina sa mga Barangay Officials human gipahibalo ni Governor Hermie Ramiro nga andam nang ihatag sa kagamhanang probinsyal ang tag-50 Mil Pesos nga ayuda sa matag barangay sa tibuok probinsya.
Kini ang nasaksihan nga reaksyon sa katawhan sa dihang gibistahan sa gobernadora ang lima (5) ka mga barangay sa Baliangao atol sa pinakaulahing Outreach Mission sa maong lungsod.
Matud pa sa mga Barangay Officials nga naghinamhinam na sila nga masugdan na ang mga proyekto nga posibleng dapatan sa maong pundo.
Daghang mga programa ug proyekto nga buot nilang mugnaon nga dako unta kaayo og ikatabang sa katawhan apan imposible na kining mahimo gumikan kay nagkinahanglan kini og igong kantidad.
Bisan gamay lamang ang 50 Mil Pesos alang sa mugnaong mga proyekto apan malaumon gihapon ang mga official nga aduna pay ayuda nga ihatag ang kagamhanang probinsyal sa umaabot nga mga panahon.
==
PROVINCIAL ROAD MANAGEMENT FACILITY YEAR 2 PROJECT SA TULO KA MGA LUNGSOD SA PROBINSYA POSIBLENG PAGASUGDAN NA
Laing kaayohan na usab ang mapahimuslan sa katawhan sa probinsya sa Misamis Occidental niining tuiga.
Kini human gilugwayan sa autralian government ang nasugdang programa sa probinsya nga mao ang Provincial Road Management Facility kon PRMF.
Ang mga lungsod sa probinsya nga makapahimulos sa 45 Million Pesos, Year 2 Road Rehabilitation sa PRMF mao ang lungsod sa Aloran, Calamba ug Sapang Dalaga.
Sa lungsod sa Aloran mao kini ang Road Rehabilitation nga nagkatidad og 31 Milyones Pesos sa gitas-on nga 6.04 Kilometer Package-B nga pagatrabaho-on sa Mindanao Rock.
Road rehabilitation gihapon sa lungsod sa Calamba nga mikantidad og 10 Milyones Pesos nga gilangkoban sa Bunawan-Dapacan Bajo Provincial Road sa gitas-on nga 2.65 kilometro nga pagatrabaho-on sa RN Builders Ug ang ikatulo mao ang Road Rehabilitation sa Poblacion-Sepac-Medallo Provincial Road Package-A nga nagkantidad og 12 Milyones Pesos sa gitas-on nga 4.06 kilometro nga pagatraboho-on sa Rudhil Construction.
Niining simanaha pa lamang gisugdan ang maong proyekto human gipahigayon ang konsultasyon sa katawhan sa matag barangay nga recipient sa maong proyekto apil na ang mga Barangay ug Municipal Officials.
Ang konsultasyon nga gipangunahan gihapon sa Provincial Governor’s Office pinaagi ni Engr. Nelson Vega, mga Engineers gikan sa Provincial Engineer’s Office nga gipangunahan ni Assistant Provincial Engineer Myrna Balaoro ug ang team sa Provincial Road Management Facility nga gipangunahan ni Atty. Roy Raagas, ang PRMF Provincial Coordinator.
==
GATOSAN KA MGA SIMILYA SA KAHOY NATISOK ATOL SA DUNGAN NGA OPERASYON SA TREE PLANTING SA MGA WOMEN’S ORGANIZATION SA TIBUOK PROBINSYA
Bisan ang kahugpongan sa mga kababayen-an sa tibuok nasud labina ang federasyon sa mga kababayen-an dinhi sa probinsya sa Misamis Occidental, giprayoridad gayud nila ang pag-atiman ug pagprotihir sa kinaiyahan.
Kini human makita nga nag-una sa ilang tema sa Women’s Month Celebration niining tuiga ang paghatag og dakong pagtagad sa dagan sa panahon karon nga nagkanayon, “Women Weathering Climate Change Governance and Accountability, Every One’s Responsibility.
Gumikan kay nag-una man ang pagpakabana sa kinaiyahan ang usa sa tumong sa selebrasyon karon sa Women’s Month, kagahapong adlawa, usa ka simultaneous o dungan nga pagpahigayon sa pagpananom sa mga similya sa kahoy sa matag hugpong sa mga kababayen-an sa matag lokalidad partikular sa Ozamiz City ug Oroquieta City.
Usa usab sa mga Women’s Advocate Sa kagamhanang probinsyal nga nanguna sa serye sa mga kalihukan sa One Month Long Celebration sa Women’s Month mao ang Provincial Gender and Development Office.
Mas labi pang nadasig ug subling nagkahiusa ang kawsa sa mga kababayen-an karon sa tibuok probinsya gumikan kay ana-a na si Governor Herminia Ramiro nga usa usab kababaye ug hugtanon gayud nga nagsuporta sa mga programa nga makahatag ug kaayohan sa mga kababayen-an.
Kahinumduman nga dili masukod ang gibating kalipay sa federasyon sa mga kababayen-an human nila nasaksihan ang sadya ug mabulokon nga Women’s Month Celebration niadtong miaging tuig nga labing unang higayon nga nahitabo sa probinsya ilalom sa administrasyon ni Governor Herminia Ramiro.
===
ADBOKASIYA SA PUWERSA SA KASUNDALOHAN SUPORTADO NI GOVERNOR HERMIE RAMIRO
Dili lamang insurhensya ang gi-monitor sa puwersa sa kasundalohan nga nakabase dinhi sa Probinsya sa Misamis Occidental kundili lakip na ang pag-monitor sa kahimtang sa mga sibilyan panahon sa kalamidad diha sa ilang area of responsibility.
Kini ang giluwatang pahayag ni Colonel Rommel Almaria ang Battalion Commander sa 55th Infantry Battalion, Philippine Army.
Ang maong kalihukan ilang gihimo subay sa mandato nga ilang nadawat gikan sa ulohang buhatan sa armadong kusog sa pilipinas nga serbisyohan ug panalipdan ang tanang katawhan ilalom sa pag-giya sa Internal Peace and Security Plan BAYANIHAN.
Nasayran nga kini ang adbokasiya karun sa armadong kusog sa pilipinas subay sa tabang usab sa mga Local Government Units ug mga katawhan.
Ang 55th Infantry Battalion sa Philippine army ang mihimo na ug hugot nga koordinasyon sa Local Government Unit sa siyudad sa Tangub, Ozamiz ug oroquieta arun sa pag-plastar ug pagpatuman sa BAYANIHAN sa tumong nga mapangandaman ang posibleng kalamidad nga mahitabo.
Samtang gisiguro ni Colonel Almaria nga dili lamang natural nga kalamidad ang ilang respondihan kundili apil na ang posibleng man made calamity.
Nasayran nga ang tibuok probinsya sa Misamis Occidental ang sakop sa Area of Responsibility sa sa 55th Infantry Battalion, siyam ka mga lungsod nga sakop sa probinsya sa Zamboanga Del Sur , ug upat ka mga lungsod sa Zamboanga Del Norte.
Bisan pa man sa kalapad sa Area of Responsibility sa 55th Infantry Battalion, mapasalamaton si colonel Almaria sa lig-ong suporta ni Governor Hermie Ramiro sa tanang aktibidad sa mga sundalo ilabi na kining pagpahigayon ug training kalabot sa Disaster Awareness and Preparedness.
KALIHUKAN SA WALHONG GRUPO NA MONITOR SA PUWERSA SA KASUNDALOHAN
Gi-angkon ni Colonel Rommel B. Almaria. Battalion Commander sa 55th Infantry Battalion, Philippine Army nga adunay mga walhong grupo ang naglihok sa mga utlanan sa probinsya sa Misamis Occidental kini subay sa ilang gipahigayong monitoring palibot sa probinsya.
Nagtuo si almaria nga nagpabilin ang walhong grupo sa maong mga lugar tungod usab kay adunay mga grupo o mga tawo nga misuporta sa kalihukan sa walhong grupo.
Kalabot niini, hugtanon ang panawagan sa nasangpit nga opisyal ngadtu sa mga katawhan nga sulbaron ang mga problema pinaagi sa malinawong lakang dungan sa pagsalig sa opisyal nga adunay kasulbaran ang tanang problema.
Kabahin usab sa monitoring sa kasundalohan ang mga tulonghaan sa probinsya diin ilang gipahigayon ang Social Awareness Symposium diin ilang target mao ang mga estudyante sa high school gisugdan sa puwersa ang maong lakang sa pipila ka mga gikonsiderang remote barangays sa Oroquieta City ug sa mga kasikbit nga mga lungsod.
Gawas niini, karung panahon sa summer, ipahigayon sa 55th IB ang Youth Leadership Summit inubanan sa mga local government units.
Ang youth leadership summit ang dungan nga ipahigayon sa youth camp sa simbahan.
===
PGMO OFFICIALS GIPAILAWON SA MONITORING AND EVALUATION SYSTEM SEMINAR
Gipailawon sa duha ka adlaw nga seminar ang mga official sa Provincial Government of Misamis Occidental (PGMO) ug uban nga mga Municipal Officials, adtong Marso 8 ug 9 pinaagi sa mga kadagko-an sa National Economic Development Authority (NEDA) Region 10 nga gipahigayon sa Municipal Function Hall sa lungsod sa Aloran.
Kini nga seminar magtudlo kon unsaon sa mga head of offices paghimo sa ilang mga role ug pagrekomendar sa mamahimong aksyon diha sa pag-implementar sa unsa man nga mga proyekto.
Gitudlo usab sa maong seminar kon unsaon pagpreparar sa report, data collection, data processing, data analysis, data submission ug sa mamahimong epekto niini.
Unang gituki sa maong seminar ang Project Development Cycle ug ang important role sa Monitoring and Evaluation sa Project Development Cycle pinaagi nila ni Engr. Jaime Pacampara ang Chief PMED ug ni Ms. Elsa Maquiling ang Senior EDS sa National Economic Development Authority (NEDA) sa Region 10.
Sa wala pa ang paniudto gihimo una ang Video Tagging Presentation ug ingon man Web Map Application pinaagi sa mga sakop sa Provincial ICT-GIS Unit nga sila si Frank Calamba, Ferdie Napigkit ug Ronald Chipocco.
Pinaagi sa Web Map Application, masayran ang mga data sa matag lungsod ug ciudad nga sakop sa probinsya ug ingon man ang kahimtang sa mga Provincial Roads ilalom sa pagdumala sa Provincial Road Manangement Facility (PRMF).
Si Engr. Ken Regalado ang Provincial Administrator maoy nagbukas sa hamubong programa nga gipahigayon sa naasoy’ng seminar isip representante ni Governor Hermie Ramiro.
Diha usab ang mga dagkong official sa probinsya sama nila ni 1st District Board Member Inocencio Pagalaran Jr, Pswd Officer Rosendo “Tibo” Requina, Provincial Planning and Development Officer Teresa Calamba, Provincial Budget Officer Mary Ann Secang, Provincial Accountant Atty. Helen Tenchavez, Provincial Treasury Bebie Gula, Human Resource Management Officer Josefina Omisol, PRMF Provincial Coordinator Atty. Roy Raagas ug uban pang mga participante.