TM BALITA
MAR. 06-12
HEADLINES
TAGSA (1) KA LIBO KA PESOS MADAWAT SA MGA BHW SA CIUDAD SA OZAMIZ
CAPITOL BUILDING SA MISAMIS OCCIDENTAL USA SA PINAKAMAANINDOT NGA STRUCTURE SA TIBUOK PILIPINAS
MGA PERSONAHE SA BUHATAN SA PAGIBIG NAKIGTAGBO NI GOVERNOR HERMIE RAMIRO SA TUYO NGA MAKAMUGNA UG PARTNERSHIP
LUNGSOD BALIANGAO MAO NA USAB ANG MAKAPAHIMULOS SA MEDICAL AND DENTAL OUTREACH MISSION NI GOVERNOR HERMIE RAMIRO
BUREAU OF INTERNAL REVENUE RD-100 KOMPYANSA NGA MAKUHA ANG P642M 2012 TARGET GOAL COLLECTION
MGA NATIONAL INFRASTRACTURE PROJECTS NAG-UNA SA TINUBDAN SA KOLEKSYON SA BUREAU OF INTERNAL REVENUE
LUNGSOD SA BALIANGAO MAO NA USAB ANG MAKAPAHIMULOS SA MEDICAL AND DENTAL OUTREACH MISSION NI GOVERNOR HERMIE RAMIRO
==
DETALYE:
TAGSA (1) KA LIBO KA PESOS MADAWAT SA MGA BHW SA CIUDAD SA OZAMIZ
Usa (1) ka Libo ka Pesos ang gipanaad ni Mayor Nova Princess Parojinog – Echavez alang sa matag Barangay Health Workers kun BHW sa Ciudad sa Ozamiz atol sa gipahigayong 17th Federated BHW Anniversary. Ang kintibuk-ang pondo na gisaad sa Mayor iyang pagakuhaon gikan sa pondo sa Barangay Nova.
Nasayran nga adunay kapin sa kinyentos (500) ang kinatibuk-ang ihap sa mga BHW gikan sa 51 ka mga Barangay sa Dakbayan sa Ozamiz.
Kahinumduman nga nawala ang pila ka mga benepisyo sa mga Barangay Health Workers tungod sa pag-ubos sa IRA kun Internal Revenue Allotment gumikan sa kamugnaan nga mahimong Ciudad ang 16 ka mga Lungsod sa Nasud nga mo-abot ngadtu sa singko porsiyento ang pagkunhod sa IRA sa mga Ciudad.
Halos 47 Milyones Pesos ang nawala sa maong pondo gumikan kay nadugangan ang ihap sa mga Ciudad sa Nasud. Luyo sa nagka-ubos nga IRA, ipatuman pa sa pangagamhanan ang salary increase sa mga regular nga empleyado. Kini ang nag-unang hinungdan sa pagkawala sa pila ka mga benepisyo sa mga Barangay Health Workers.
Taliwala niini, gipaningkamutan sa pangagamhanang lokal sa Ozamiz nga mahatagan gihapon ang mga BHW ug pahalipay luyo sa maong mga gimbug-aton.
Usa niini gipanaad sa Mayor nga sa sunod tuig, iyang paningkamutan nga nga maapil sa budget ang tag-dos mil pesos sa matag BHW matag tuig.
Nasayran nga mi-ubos usab ang IRA sa mga barangay diin niadtong bulan lamang sa Enero kini nasayran sa mga Barangay Kapitan.
Luyo niini, gipadangat ni Mayor Nova Princess Parojinog-Ehavez ang iyang pasalamat ngadto sa tanang mga Barangay Health Workers sa padayong paglihok sa ilang tagsa-tagsa ka ma barangay taliwala sa mga problema nga nasinatian karong panahona.
Gipasalamatan usab ni Mayor Echavez si Governor Hermie Ramiro sa gihatag niining suporta sa tanang mga programa ug kalihukan ingon man mga proyekto sa pangagamhanang local sa Ozamiz .
==
CAPITOL BUILDING SA MISAMIS OCCIDENTAL USA SA PINAKAMAANINDOT NGA STRUCTURE SA TIBUOK PILIPINAS
Midangat dinhi sa Probinsya sa Misamis Occidental ang usa ka grupo kun Advisory Council for National Committee on Monuments and Sites of the National Commission for Culture and the Arts nga gipangunahan ni Architect Dominic Galicia.
Tumong sa grupo nga paghidangat dinhi sa Probinsya sa Misamis Occidental mao ang pagtan-aw ug pagtuon sa mga istruktura particular na sa Provincial Capitol Building nga magpabilin ang karaang istruktura niini nga matud pa, gi-desinyo pa ni Architect Juan Arellano niadtong 1930.
Nasayran nga si Architect Juan Arellano maoy nagpaluyo sa Metropolitan Museum, the National Museum ug uban pang mga gikonsiderang Endangered American Era-Neo Classical Building dinhi sa Nasud Pilipinas.
Sumala pa ni architect Galicia nga ang provincial capitol building ang usa sa pinakamaanindot nga gambalay sa tibuok pilipinas.
Kalabot niini, mipadayag ug kalipay si Architect Galicia tungod wala makawang ang ilang paningkamot nga magpabilin ang daang istruktura sa kapitolyo tungod mismo kay si Governor Hermie Ramiro ang namahayag ug suporta sa ilang mga paningkamot sanglit gikauyonan nga adunay mahitabong regular meeting tali sa contractor ug sa mga personahe gikan sa National Commission for Culture and the Arts aron sa pag-check kanunay sa posibleng tandugon sa istruktura panahon sa renovation.
Kahinumduman nga una nang gipanaad sa contractor sa maong proyekto nga kini ang ilang humanon sulod lamang sa usa (1) ka tuig.
==
MGA PERSONAHE SA BUHATAN SA PAGIBIG NAKIGTAGBO NI GOVERNOR HERMIE RAMIRO SA TUYO NGA MAKAMUGNA UG PARTNERSHIP
Tuyo nga midangat dinhi sa Probinsya sa Misamis Occidental ang mga personahe nga gikan sa Pagibig gikan sa Ciudad sa Cagayan de Oro ug Ciudad sa Pagadian aron makahinabi personal si Gobernador Herminia Ramiro.
Tumong sa maong grupo sa pagdangat dinhi sa probinsya aron sa pag-enganyo sa pangagamhanang probinsyal nga mosulod sa usa ka partnership aron mahinayon na ang programa sa Provincial Government kalabot sa Housing Project alang sa mga empleyado.
Sumala pa ni Gregorio Luba Jr, personahe sa Pagibig Fund, Pagadian Branch nga maayo ang nasangpit nga proyekto tungod kay maka-generate kini sa kapin 250 ka nga house and lot diin ang priority mao ang mga empleyado sa pangagamhanang probinsyal ug mosunod ang uban pang mga Pagibig Fund Members.
Nasayran nga usa sa gihingusgang proyekto ni Gobernador Hermie Ramiro mao ang pabalay alang sa mga empleyado sa pangagamhanang probinsyal sa Misamis Occidental.
==
LUNGSOD BALIANGAO MAO NA USAB ANG MAKAPAHIMULOS SA MEDICAL AND DENTAL OUTREACH MISSION NI GOVERNOR HERMIE RAMIRO
Human nakapahimulos sa Medical and Dental Outreach Mission ang mga barangay sa lungsod sa Bonifacio adtong bulan sa Enero ug Pebrero 2012, lain na usab nga mga barangay ang do-awon ni Governor Hermie Ramiro dala ang iyang Medical and Dental Team aron sa pagserbisyo na usab sa iyang mga katawhan alang sa ilang maayong panglawas.
Kini ipahigayon karong petsa 8, 9, 10 ug 15 ning bulan sa Marso ngadto sa 15 ka mga Barangay sa Lungsod sa Baliangao nga adunay mosubra sa 3 mil ka mga pamilya ug mosubra usab sa 15 Mil ka mga lumolopyo nga dugay nang naghandum nga mapahigayonan usab sila sa maong serbisyo.
Usa usab sa tuyo sa gobernadora sa pagduaw sa maong mga barangay aron mohimo ug barangay consultation, maoy hinungdan nga gidala usab niya ang Medical and Dental Team aron maalagaran usab ang mga kaigsoonan ilabi na adtong adunay mga balati-an nga maglisod pagpa-check up ug ingon man pagpalit ug mga tambal.
Kahinumduman nga unang nakapahimulos sa Medical and Dental Outreach Mission ni Governor Hermie Ramiro ang 18 ka mga barangay sa lungsod sa Concepcion adtong tuig 2010 ug nianang pagka 2011 bulan sa Pebrero ug Marso, gisunod ang 28 ka mga barangay sa lungsod sa Lopez Jaena, ang 19 ka mga barangay sa Lungsod sa Calamba adtong Bulan Hunyo, ang 28 ka mga barangay sa lungsod sa Sapang Dalaga adtong bulan sa Oktobre tuig 2011.
Luyo sa batakang serbisyo nga nahimo ni Governor Hermie Ramiro ngadto sa mga katawhan sa naasoy’ng mga barangay, sila mapasalamaton pag-ayo gumikan kay dako kaayo kini ug tabang ngadto kanila ilabi na adtong mga pamilya nga nanimuyo sa bukirang bahin sa probinsya nga maglisod ug pagpatambal, gawas nga walay kwarta layo usab ug tambalanan.
Niini, malaumon usab ang uban nga mga kaigsoonan nga wa’ pa maabot sa medical and dental outreach mission ni governor ramiro nga makapahimulos usab sila sa maong serbisyo.
BUREAU OF INTERNAL REVENUE RD-100 KOMPYANSA NGA MAKUHA ANG P642M 2012 TARGET GOAL COLLECTION
Bisan dili kanunay ang maayong dagan sa ekonomekanhong kahimtang sa nasud apan kompyansa gihapon ang matag Revenue District sa Bureau of Internal Revenue kon BIR nga makuha nila ang matag tuig nga target goal collection.
Gipahayag ni Atty. Maria M. Alfonso, ang Revenue District Officer sa BIR sa Probinsya sa Misamis Occidental nga matag tuig nagkataas ang gi-obligar nga target goal apan padayon kini nilang natuman sulod sa dugay na nga panahon.
Niining tuiga, mas dako ang gimandong target goal nga mikabat og P642M kon itandi niadtong miaging tuig nga mikabat og P550M ug malampuson nila kining nakuha.
Hinuon adunay mga kwarter nga medyo ubos ug wala gayud makaabot sa matag kwarter nga target goal apan aduna usay mga kwarter nga mokapin pa ang ilang koleksyon.
Dugang pa ni Alfonso nga kini ilang nakab-ot bunga usab sa suporta ug kooperasyon sa mga Tax Payers sa pagtuman sa ilang obligasyon sa buhis.
Iyang gipasalig nga ang mga buhis nga ilang nakolekta gikan sa katawhan, kompleto usab kining mabalik sa katawhan pinaagi sa mga programa ug proyekto nga mamugna sa kagamhanan sa matag lokalidad.
==
MGA NATIONAL INFRASTRACTURE PROJECTS NAG-UNA SA TINUBDAN SA KOLEKSYON SA BUREAU OF INTERNAL REVENUE
Malaumon gihapon ang Bureau of Internal Revenue District-100 nga sa pagtungtong sa ikaduhang kwarter niining tuiga mas motaas pa sa gilaumang target goal collection.
Kini human wala matuman sa Revenue District Office ang target goal sa unang kwarter labina sa bulan sa Pebrero.
Gipasabot ni Atty. Maria M. Alfonso, Revenue District Officer nga usa sa mga hinungdan kun’ nganong miubos ang ilang koleksyon labina sa bulan sa pebrero gumikan kay wala kaayo’y gipatumang mga konstruksyon labina ang Department of Public Works and Highways kon DPWH.
Nagto-o ang ahensya nga ang dili maayong dagan sa panahon maoy usa sa mga hinungdan nga wala kaayo’y gipatumang mga proyekto.
Gumikan kay usa man ka agricultural area ang probinsya, nagsalig lamang ang BIR sa mga tax collection gikan sa panghimuon nga mga construction projects nga maoy dagko’g natabang sa ilang matag tuig nga Target Goal Accomplishment.
Hinuon wala usab kalimti sa BIR ang dakong natabang sa mga individual taxes labina ang mga negosyante sa Local Tax Collection sa tibuok Probinsya sa Misamis Occidental.
==