TM BALITA
FEB. 11-12
HEADLINES
PAGTUNGHA SA MGA ESTUDYANTE SA MGA FISHERFOLKS NGA APEKTADO SA BAGYONG SENDONG APEKTADO USAB
KAPOLISAN SA LUNGSOD SA BALIANGAO HINGPIT NA ANG PAGPANGANDAM ALANG SA SELEBRASYON SA KASAL NI MAYOR SVETLANA JALOSJOS
BPAT TRAINING PINAKAULAHING GIPAHIGAYON SA LUNGSOD SA BALIANGAO, MISAMIS OCCIDENTAL
PINASAHING SELEBRASYON SA ARAW NG CALAMBA MASAKSIHAN NING UMAABOT NGA VALINTINES DAY
DANYOS SA BAG-ONG INSIDENTE SA PAGBAHA SA LUNGSOD SA CLARIN UG TUDELA SA MGA KABTANGAN, AGRIKULTURA UG IMPRASTRAKTURA MAS MIDAKO PA
KAGAMHANANG PROBINSYAL MIHIMO GILAYON OG AKSYON ALANG SA MGA KAEGSUONAN SA CLARIN UG TUDELA NGA APEKTADO SA MAKUSOG NGA BAHA
==
DETALYE:
PAGTUNGHA SA MGA ESTUDYANTE SA MGA FISHERFOLKS NGA APEKTADO SA BAGYONG SENDONG APEKTADO USAB
Dili lang panginabuhi sa mga fisherfolks sa lungsod sa Baliangao, partikularmente sa Barangay Punta Miray Ang naapektuhan sa kalimad bunga sa Bagyong Sendong, kon dili naapektuhan usab ang pag-eskwela sa ilang mga anak.
Sumala pa ni Barangay Kapitan Marichu Yap sa Barangay Punta Miray sa nasangpit nga lungsod, nga usa sa nahimong dakong suliran karon sa 165 ka mga fisherfolks sa iyang barangay mao ang pagkahunong sa pag-eskwela sa ilang mga anak sanglit dili lang kay naglisod sila sa pagkaon sa matag adlaw, naglisod usab sila sa paghatag sa pamasahe ug pabalon sa ilang mga anak nga nag-eskwela.
Subay niini, gibati og kaguol anginahan sa barangay sanglit gisayangan siya sa pag-undang sa pagtungha sa maong mga bata gumikan kay haduol na lamang unta ang bulan sa marso kon diin motapos ang usa ka tuig nilang pagtungha.
Gipasabot sa kapitana nga ang hinungdan sa pag-undang sa pagtungha sa maong kabataan gumikan sa sobrang kalisod sa panalapi sa ilang mga ginikanan sanglit dili pa mahalin ang ilang mga kuhang isda nga mao ray bugtong gisaligan sa panalapi.
Nasayran nga kasagaran sa nangundang nga kabataan mao ang nagtungha sa Baliangao School of Fisheries nga nahimutang sa barangay mismo sanglit halayo man ang maong tunghaan gikan sa ilang matag panimalay.
Dugang nasayran nga kining maong suliran ang pagahimoan og aksyon usab ni Kapitana Yap pinaagi sa pagduol sa Principal sa Baliangao School of Fisheries diin nagtungha ang nasangpit nga kabataan aron sa paghangyo nga mapabalik sa pagtungha ang nangundang nga mga tinun-an bisan pa man kon taas-taas na ang mga adlaw sa wala pagtunghan niini.
==
KAPOLISAN SA LUNGSOD SA BALIANGAO HINGPIT NA ANG PAGPANGANDAM ALANG SA SELEBRASYON SA KASAL NI MAYOR SVETLANA JALOSJOS
Anaa sa pagpangandam karon ang kapolisan sa lungsod sa Baliangao alang sa selebrasyon sa kasal ni Mayor Svetlana Jalosjos nga ipahigayon karong umaabot Pebrero 14 adlawng Martes sa may Mt. Carmel Parish sa maong lungsod.
Sumala pa ni Police Senioir Inspector Glyndo Pujanes ang Officer-In-Charge sa Police Station sa baliangao nga ipatuman nila ang higpit nga seguridad sa kalinaw sa tibook lungsod sa maong adlaw, sanglit gilauman nga adunay daghang mga inilang personalidad gikan sa mga nagkalain-laing dapit partikularmente sa kauluhan nga mosaksi sa maong okasyon.
Gipasabot ni Pujanes nga nianang tungura mamahimong kaabag sa kapolisan sa pagpatuman sa kahusay ug kalinaw ang mga CVO nga karon bpat nga bag-ohay lamang nga migradwar sa ilang training.
Gipahibalo usab ni Pujanes nga adunay pagahimoong rerouting sa mga sakyanan nga mosulod sa centro nga bahin sa baliangao atol sa maong adlaw.
==
BPAT TRAINING PINAKAULAHING GIPAHIGAYON SA LUNGSOD SA BALIANGAO, MISAMIS OCCIDENTAL
Hingpit nang kumpleto ang pagpahigayon sa BPAT training sa tibook probinsya sa Misamis Occidental, human natapos ang gihimong BPAT training sa 180 ka mga trainees nga gilangkoban sa mga barangay kapitan ug mga CVO sa 16 ka mga barangay sa lungsod sa Baliangao niadtong Adlawng Hwebes, Pebrero 9, 2012.
Sumala pa ni Police Senioir Inspector Glyndo Pujanes ang Officer-In-Charge sa Police Station sa lungsod sa Baliangao, nga ang gipahigayong BPAT training sa ilang lungsod usa na lamang ka pagpalab-as o refresher sa mga natudlo o nakat-unan na nga mga kaakuhan o responsibilidad sa matag CVO sa una nang gihimong training sa mga CVO niadtong milabayng tuig 2011.
Subay niini, gikalipay ni Police Senioir Inspector Pujanes ang partisipasyon sa mga CVO nga bpat na usab karon sa lungsod sa Baliangao sa pagpatuman o sa implementasyon ug pagbantay sa kahusay ug kalinaw sa tibook lungsod partikularmente sa ilang matag barangay, sanglit iyang nakita nga dako kaayo ang natabang niini sa kahusay ug kalinaw karon sa maong lungsod.
Gidason usab ni Vice-Mayor Jojo Yap nga dako gayod og gikatabang ang mga CVO sa pagpatuman sa kahusay ug kalinaw sa lungsod sa Baliangao, sanglit sa kagamay ra sa gidaghanon sa ilang kapolisan dili maakupa ang pagbantay o pagmonitor sa kahusay ug kalinaw sa matag barangay.
==
PINASAHING SELEBRASYON SA ARAW NG CALAMBA MASAKSIHAN NING UMAABOT NGA VALINTINES DAY
Usa ka pinasahing pagselebrar sa ika-64 ka anibersaryo sa pagkamugna isip lungsod sa Calamba ning umaabot pebrero 14 adlaw sa Valentines Day nga nagdala sa tema nga “gugma: tulay sa kahiusahan, kalinaw ug kalamboan.”
Sumalapa ni Calamba Tourism Officer Yzel Villanueva nga usa ka sadya ug bibo nga kasaulogan ang masaksihan sa katawhan sa maong lungsod ug sa mga bisita sa ilang pagselebrar sa nasangpit nga anibersaryo, sanglit nagkadiyang padula angilang giandam, sama sa mga inter-sectoral ball games ug mga pilipino games sama sa maria and mario went to town, driving the pig home, pop the ballon, fish relay gamit ang papel nga isda nga paluparon, treasure hunting, tanging hinga mo, pailog sa pagdakop sa mga baktin nga gieksklusibo lamang sa 19 ka mga barangay kapitan ug aduna usay Search sa Hara ng Calamba 2012 ug uban pa.
Gidugang pa ni Villanueva nga iyang gilauman nga ang maong kasaulugan mamahimong bibo gumikan sa hiniusang pagsuporta ug kooperasyon sa mga opisyales ug katawhan sa 19 ka barangay sa maong lungsod.
Subay niini, gidapit ang mga kaigsoonang misamisnon sa pagsaksi sa maong kalihukan nga gilaumang makalingaw sa tanang motan-aw sa unang higayon.
==
DANYOS SA BAG-ONG INSIDENTE SA PAGBAHA SA LUNGSOD SA CLARIN UG TUDELA SA MGA KABTANGAN, AGRIKULTURA UG IMPRASTRAKTURA MAS MIDAKO PA
Kun’ sa miaging pagbaha tubig ug mga gapnod lamang ang mibanlas sa mga kabalayan labina sa Barangay Dolores ug Pan-ay Daku sa Clarin ug sa sentrong bahin sa Tudela apan karon nagdala na kini og Bagang Lapok.
Ang hinungdan kun’ nganong ingon niadto ka kusog ang pagbanlas sa tubig baha gikan sa bukid bunga sa pagbundak usab sa makusog nga ulan sayo sa kagabhi-on ug milungtad pa gayud kini hangtud sa kadlawon.
Sa pagmonitor sa mga lumilihok sa Extension Office ni Governor Hermie Ramiro nga gipangulohan ni Ms. Bernadeth Pusod, kuyog ni Rambie, Bebie ug sa piloto nga si Larry Calinga, makita gayud ang paglapaw sa tubig baha gikan sa highway sa lungsod sa Clarin, hangtud sa highway sa Centro Napu padulong sa sentrong bahin sa lungsod.
Makita gayud ang kakusog sa tubig baha gumikan kay nangabuho ang mga bahin niini nga nalabyan sa tubig ug nangatumba ang mga parel sa mga panimalay ug tulonghaan.
Gani miabot pa ang tubig baha sa palibot sa munisipyo sa Tudela ug sa mga edipisyo nga silingan niini, usa na ang fire station, hospitals ug uban pa.
Gawas sa mga kabtangan, dako usab og nahimong danyos ang baha sa agrikultura labina sa mga basakan nga bag-o pang gitanoman nga ang toneladang balas nga dala sa baha, mitambag kini sa pipila kakahon nga basakan partikular gihapon sa lungsod sa Tudela, lakip na ang Lungsod sa Clarin.
Sa miaging pagbaha, partikular sa Barangay Pan-ay Dako, nagamit gilayon ang spellway human mikupos ang bul-og sa tubig. Apan sa kahimtang karon, posibleng molungtad pa og pipila kaadlaw una magamit pagbalik ang spellway gumikan sa pagkaguba sa approach niini.
Apan bisan pa sa kakusog sa pagbaha kagabi-i, dako gihapon ang pasalamat sa mga residente nga walay bisan usa nga nakabsan gawas lamang sa minor injuries nga nahiagoman sa usa ka residente sa Pan-ay Daku ug Pan-ay Diot sa Tudela.
Sa pagkakaron ang mga barangay officials, padayon nga pagbantay sa lakat sa panahon ug pag-atiman sa mga apektadong ginsakopan uban ang pag-alayon sa mga opisyales sa matag LGU sa Clarin ug sa Tudela.
Sa pakighinabi ni Punong Barangay Teodoro “boy” sumina sa Barangay Pan-Ay Daku, iyang gipahayag nga gumikan sa maong hitabo, nangayo na siya og tabang sa LGU o sa kagamhanang probinsyal nga hingpit nga masulbad ang paglapaw sa tubig sa ilang barangay nga posibleng mokalas na gayud og kinabuhi kun’ sa labing dali nga panahon dili kini kahatagan og pagtagad.
Tuyo niya nga buhatan na lamang og flood control ang bahin sa maong suba nga daling malapawan sa tubig baha.
==
KAGAMHANANG PROBINSYAL MIHIMO GILAYON OG AKSYON ALANG SA MGA KAEGSUONAN SA CLARIN UG TUDELA NGA APEKTADO SA MAKUSOG NGA BAHA
Mihimo ug dinali-ang aksyon ang Provincial Government pinaagi ni Provincial Administrator Ken Regalado ubos usab sa mando ni Governor Hermie Ramiro pinaagi sa pagpadala gilayon ug mga sakyanan sama sa Dump Truck nga maoy gigamit sa paghakot sa mga apektadong residente sa baha sa Lungsod sa Clarin ug Tudela kagabii pinaagi sa paggiya sa Provincial Disaster Risk Reduction and Management Council ug sa Misamis Occidental Search and Rescue Team ingon man ang Quick Response Team sa MOPH ug daling gipanghakot ang mga apektadong residente sa gipang-designate nga mga evacuation area labina sa Lungsod sa Tudela.
Bisan apektado ang pipila ka mga lungsod ug ciudad sa probinsya sa pinakabag-ong insidente sa pagbaha kagabi-i labina ang Ozamiz City nga halos sa tagapa-a ang gitas-on sa tubig dala sa pagbundak sa makusog nga ulan, apan unang gitutokan sa kagamhanang probinsyal ang lungsod sa Clarin ug Tudela gumikan kay ana-a sa maong dapit ang adunay dako nga danyos ug daghan pa gayud ang naapektahang pamilya bunga sa makusog nga baha.
Sayo sa buntag mihimo gilayon ug pagdu-aw ang mga sakop sa Governor’s Extention Office sa pagpanguna ni Ms. Nadet Pusod ngadto sa mga apekdadong lugar sa Lungsod sa Clarin ug Tudela dala ang mga sinakong bugas humay, noodles, dilata ug mga tambal ug direktang gihatud sa mga apektadong residente sa makusog nga baha kagabii.
Ang maong hinabang, gihatod gayud sa mga barangay nga grabe gayu’ng naapektahan sa baha, labina sa Barangay Dolores, Pan-ay Daku, Lupagan ug barangay dela Paz, ingon man sa mga kabarangayan nga sakop sa lungsod sa Tudela sama sa Brgy. Sebac, Basirang, Pan-ay Diot, Yahong, Locso-on, Bara, Cabol-anon, Centro Napu, Taguima, Nailon ug Barangay Tigdok.
Gipasalamatan usab sa kagamhanang probinsyal ang pag-ayuda sa mga sakop sa 55th Infantry Batallion ilalom sa mando sa bag-ong Batallion Comander nga si Lt. Col. Rommel Almaria nga nakabasi sa Camp Burgos, Lopez Jaena, Misamis Occidental.
Samtang padayon usab ang pagmonitor sa Department of Social Welfare and Development ug sa Department of Agriculture gikan sa Municipal ug Provincial Office ngadto sa mga apektadong residente alang sa posibleng tabang unya niini.
==