TM BALITA
FEB. 01-12
HEADLINES
TRES MILYONES PESOS KAPIN NGA ROAD IMPROVEMENT SA BRGY. KATIPUNAN, SINACABAN NGA GIPANGUNAHAN SA KALAHI-CIDSS, DSWD GIINAGURAHAN
GOV. HERMIE RAMIRO, GIPASALAMATAN NI SINACABAN MUNICIPAL MAYOR DELLO LOOD GUMIKAN SA PADAYONG PAGSUPORTA NIINI SA MGA PROGRAMA UG PROYEKTO SA IYANG LUNGSOD
LUNGSOD SA SINACABAN, USA SA MGA LUNGSOD SA PROBINSYA NGA MAKAPAHIMULOS SA MUNICIPAL RURAL DEVELOPMENT PROJECT SA DEPT. OF AGRICULTURE KARONG TUIGA
MGA MAGTUTUDLO SA DIWAT NATIONAL HIGH SCHOOL NAGPASALAMAT SA KAGAMHANANG PROBINSYAL SA PAGHATAG OG DISASTER RISK REDUCTION AND MANAGEMENT TRAINING
FEED MILL GIKAN SA MUNICIPAL RURAL DEVELOPMENT PROJECT IPAHIMUTANG SA BARANGAY LANGUB MISAMIS OCCIDENTAL
HOLY ROSARY PARISH OROQUIETA CITY MISAULOG SA QUASQUICENTENNIAL O IKA-125 KA KAMUGNAAN SA PAROKYA
==
DETALYE:
TRES MILYONES PESOS KAPIN NGA ROAD IMPROVEMENT SA BRGY. KATIPUNAN, SINACABAN NGA GIPANGUNAHAN SA KALAHI-CIDSS, DSWD GIINAGURAHAN
Sayon na alang sa mga residente mismo sa Barangay Katipunan ug sa mga silingang barangay nga moagi sa usa sa mga dalan sa maong barangay padulong sa sentrong bahin sa Lungsod sa Sinacaban.
Kini human nakapahimulos ang maong barangay sa Road Improvement Project nga gipatuman sa Department of Social Welfare and Development pinaagi sa Kapit-Bisig Laban sa Kahirapan Comprehensive and Integrated Delivery of Social Services kon KALAHI-CIDSS.
Bisan og road gravelling ug pagkongreto lamang sa kanal sa maong karsada apan miabot og tres milyones pesos kapin ang kinatibuk-ang kantidad sa maong proyekto
Pinakado niini og porsyento ang pundo gikan sa KALAHI-CIDSS UG ang counterpart sa kagamhanang probinsyal, LGU sa sinacaban ug ang pahina system sa mga residente nga nagtrabaho niini
Kompyansa ang DSWD, ang kagamhanang probinsyal ug ang Component LGU sa Sinacaban nga molungtad og dugay ang maong proyekto bisan kini dili kongreto pinaagi sa pag-atiman sa mga residente human sila nanumpa nga ila kining himuon.
Atol sa inagurasyon, didto ang presensya ni Mayor Dello Lood, mga lumilihok sa dswd gikan sa rehiyonal ug municipal, mga barangay official pinaagi sa pagpanguna ni Punong Barangay Andrew Agunod ug katawhan sa Barangay Katipunan.
==
GOV. HERMIE RAMIRO, GIPASALAMATAN NI SINACABAN MUNICIPAL MAYOR DELLO LOOD GUMIKAN SA PADAYONG PAGSUPORTA NIINI SA MGA PROGRAMA UG PROYEKTO SA IYANG LUNGSOD
Kun’ hisgotan ang mga proyekto nga gipatuman sa Kapit-Bisig Laban sa Kahirapan Comprehensive and Integrated Delivery of Social Services kon KALAHI-CIDSS, usa ang lungsod sa sinacaban sa mga lungsod nga sakop sa probinsya sa misamis occidental nga padayong nakapahimulos niini.
Kini nga kalamboan sa lungsod sa Sinacaban, kinasingkasing kaayong gipasalamatan ni Mayor Dello Lood gumikan kay dako kaayo kini og tabang sa katawhan labina niadtong nanimuyo sa bukirang bahin sa lungsod.
Matud pa sa mayor nga kun’ saligan lamang ang pundo gikan sa lungsod, walay mahitabo nga kalamboan sa mga kadalanan sa mga rural barangay gumikan sa kagamay lamang sa Internal Revenue Allotment matag tuig.
Gawas sa tabang gikan sa KALAHI-CIDSS, madasigon usab nga mipasalamat ang mayor sa kagamhanang probinsyal pinaagi ni Governor Hermie Ramiro bunga usab sa padayong pagsuporta sa gobernadora sa matag proyekto nga himuon sa iyang lungsod labina ang counter-sharing sa higayon nga adunay himuon nga proyekto ang KALAHI-CIDSS sa Lungsod sa Sinacaban.
Dugang pa sa mayor nga kun’ magpadayon ang ingon niini nga suporta sa kagamhanang probinsyal ug sa DSWD, sa dili madugay, ang tanang mga kadalanan sa bukirang bahin sa lungsod molambo na og mas mapasayon pa ang panginabuhi sa katawhan sa maong dapit.
==
LUNGSOD SA SINACABAN, USA SA MGA LUNGSOD SA PROBINSYA NGA MAKAPAHIMULOS SA MUNICIPAL RURAL DEVELOPMENT PROJECT SA DEPT. OF AGRICULTURE KARONG TUIGA
Giisip ni Mayor Dello Lood nga usa ka panalangin gikan sa kahitas-an ang mga programa ug proyekto nga natagamtaman karon sa iyang lungsod
Gipahayag sa mayor nga sukad pa niadtong mga nangaging tuig, sunod-sunod ang mga proyekto nga napahimuslan sa lungsod gikan sa Department of Social Welfare and Development kon DSWD pinaagi sa gipatumang programa niini nga mao ang Kapit-Bisig Comprehensive and Integrated Delivery of Social Services kon KALAHI-CIDSS, usa ka nasudnon nga programa aron sa tuyo nga inanay nga mawala ang estado sa kapobrehon sa mga pilipinhon.
Kompyansa ang mayor nga gumikan sa maayong dagan sa proyekto, posible nga karong pipila ka mga adlaw, la-in na usab nga pundo ang ihatag sa dswd alang sa pagpadayon nga pagpalambo sa mga kadalanan sa maong lungsod.
Gawas sa KALAHI-CIDSS, sangko usab sa langit ang gibating kalipay sa mayor gumikan kay duha ka mga proyekto ang mapahimuslan na usab sa katawhan sa maong lungsod pinaagi Municipal Rural Development Project gikan sa Department of Agriculture.
Unang proyekto nga idapat sa pipila ka mga barangay sa Sinacaban, mao ang MRDP gikan sa kagamhanang probinsyal pinaagi sa pagahin ni Governor Hermie Ramiro ug MRDP gikan sa kagamhanang lokal sa Sinacaban.
Kini proyekto, sama gihapon sa KALAHI-CIDSS, ang hinay-hinay nga pagpalambo sa mga kadalanan sa bukirang bahin sa lungsod sa Sinacaban.
==
MGA MAGTUTUDLO SA DIWAT NATIONAL HIGH SCHOOL NAGPASALAMAT SA KAGAMHANANG PROBINSYAL SA PAGHATAG OG DISASTER RISK REDUCTION AND MANAGEMENT TRAINING
Gusto na gayud unta sa mga magtutudlo sa Diwat National High School nga sa labing dali nga panahon makabalhin na sila sa nakitang Relocation Area nga ana-a nahimotang sa Barangay Tusik, Bonifacio, bisan na lamang og magtukod sila og mga tent o mga payag-payag isip temporaryong klasehan.
Ingon niini kaaporado ang mga magtutudlo labina sa ilang Principal nga si Ralf Castillon gumikan sa kabalaka nga basin mahitabo na unya ang ilang gikahadlokan nga kalamidad human nakompirmar nga ang bungtod nga nag-umbaw sa ilang tulonghaan, hamyang sa landslide.
Apan bisan sa iyang kaporsigidong mobalhin sa labing dali nga panahon, wala siya’y mahimo gumikan kay bisan og tent o mga payag-payag ang planong tukoron isip himuong temporaryo nga klasehan sa mga estudyante didto sa relocation site, mogasto gihapon kini og dakong kantidad.
Hinuon iyang gipasabot nga sa Marso, posibleng moguwa na ang order uban ang pundo alang sa pagatukoron nga mga building, apil na ang pagpalambo sa school campus human niya nahibalo-an nga ato-a na sa Central Office sa Department of Education ang mga dokumento nga nag-awhag sa pagpabalhin sa tulonghaan.
Gawas sa 200 Mil Pesos nga financial assistance nga gihatag ni Governor Hermie Ramiro nga makatabang sa bisan unsang pagpalambo sa relocation site, gipasalamatan usab sa mga magtutudlo ang gipadalang mga kawani sa Misamis Occidental Search and Rescue Team kon MOSART nga maoy mipasayon sa gihimong seminar workshop sa mga magtutudlo ug mga estudyante sa posibleng mga kalamidad nga mohulga sa tulonghaan o ang mga precautionary measures nga pagahimuon kun’ aduna nay tilimad-on sa posibleng mahitabong landslide.
FEED MILL GIKAN SA MUNICIPAL RURAL DEVELOPMENT PROJECT IPAHIMUTANG SA BARANGAY LANGUB MISAMIS OCCIDENTAL
Laing dakong proyekto sa agrikultura nga makatabang sa mga mag-uuma ang ipahimutang sa Barangay Langub, Calamba Misamis Occidental.
Kini nga proyekto mao ang Feed Mill Project nga dihatag ug pinunduhan sa MRDP kon Mindanao Rural Develpoment Project sa Provincial Department of Agriculture sa Misamis Occidental.
Ang nasangpit nga proyekto ang pagadumalahon sa mga beneficiaries sa kahugpungan sa mga RIC kon Rural Improvement Club sa Barangay Langub.
Sumala pa ni Ma.Cristina Sinodivila nga kini nga proyekto ang napanahon sa mga mag-uumang bag-ong migradwar sa School on the Air Post Harvest handling and marketing of corn sanglit dili na unya sila maglisod sa pagpangita sa mabaligyaan sa ilang mga abot nga mga mais gumikan kay ang nasangpit nga ang organization nga maoy mag-operate sa feed mill ang mokompra na unya niini.
Gipasabot ni Sinodivila nga mas mapasayon na unya ang pagbaligya sa mga mag-uuma sa ilang abot nga mga mais ilabina niadtong mga nagpuyo duol sa barangay langub kon diin ipahimutang ang nasangpit nga Feedmill.
Subay niini, pagalauman nga mas mokusog na ang produksyon sa mais sa probinsya gumikan sa dili na lisod ang pagbaligya unya niini sa merkado gumikan sa Feed Mill nga mag-operate na unya dinhi sa probinsya nga andam nga mokompra sa tanang produktong mais.
HOLY ROSARY PARISH OROQUIETA CITY MISAULOG SA QUASQUICENTENNIAL O IKA-125 KA KAMUGNAAN SA PAROKYA
Gisaulog ang balaanong kasaulugan sa ika-125 ka tuig sa kamugnaan o Quasquicentennial Celebration sa simbahan sa Holy Rosary Parish sa Oroquieta City niadtong milabayng Enero 29, 2012.
Usa ka santos nga misa ug seremonyas ang gipahigayon isip pagbukas sa nasangpit nga kasaulugan nga sinaksihan ug gitambongan nila ni Governor Hermie Ramiro, 1st District Congressman Jorge Almonte uban ni Ex-Oficio Board Member Aurora Virginia Almonte ug uban pang mga bisita nga misuporta sa maong selebrasyon.
Kini nga kasaulugan ang nagdala sa tema nga “mahal nga birhen sa santo rosaryo lig-ona ang among pagtuo aron motubo kami sa pagkahimong dakong banay sa dios” .
Ang maong selebrasyon ang nagpamatuod ug nagpakita sa kalig-on ug kahiusahan sa mga magtutuong katoliko sa Eglesia Katolika nga simbahan sa Oroquieta City.
Atol sa pagbukas sa selebrasyon mipadayag si Congressman Jorge Almonte sa iyang mensahe pasalamat ug pasidungog sa pagpakighiusa sa katawhang katoliko sa syudad sa Oroquieta sa pagsaulog sa balaang kalihukan sa anibersaryo sa pagkamugna sa Parokya sa Santo Rosaryo o Holy Rosary Parish.
Gipasidunggan usab sa kongresista ang katawhang nagsuporta pinaagi sa pag-ampo kanilang mga lideres sa probinsya ug sa syudad sa oroquieta nga mahatagan sila sa giya sa pagpangalagad alang sa kalamboan sa katawhan.
Gidasig usab ni Congressman Almonte ang katawhan sa pagpadayon sa pagpalambo sa katolikong pagtuo ug mga kalihukan sa simbahan sama sa pagsaulog sa mga balaang selebrasyon sa Eglesia Katolika, sa makanunayong pag-ampo ngadto sa ginoo, ni Sr. Santo Niño ug kang birhen maria alang sa kaluwasan ug kalinaw sa kinatibuk-ang probinsya sa Misamis Occidental.
Usa usab sa mga kalihukan nga gipahigayon sa nasangpit nga selbrasyon sa Quasquicenteenial mao ang pagsaulog sa kapiostahan ni Sr. Santo Niño, diin mipahigayon sa paghalad sa pagsayaw sa sinulog ang mga debotante niini.