TM BALITA
JAN. 29-12
HEADLINES:
PADAYONG PROGRAMA SA MAAYONG PANGLAWAS NI GOVERNOR HERMIE RAMIRO SA LUNGSOD SA BONIFACIO GIKALIPAY PAG-AYO SA KATAWHAN NGA NAKAPAHIMULOS
MGA OPESYALES SA LUNGOD SA BONIFACIO, MIPADAYAG SA ILANG DAKONG PASALAMAT NGADTO NI GOV. RAMIRO BUNGA SA PADAYONG PAGHATAG SA MGA NAG-UNANG SERBISYO SA LUNGSOD
MGA AGRICULTURE TECHNICIAN SA LIMA KA PROBINSYA SA REHIYON DIEZ GIPAILALOM SA USA KA PEST MANAGEMENT TRAINING ON HIGH VALUED CROPS
MGA TECHNICIAN NGA PARTISIPANTE SA PEST MANAGEMENT TRAINING ON HIGH VALUED CROPS NAKADAYEG SA KAANINDOT SA MISAMIS OCCIDENTAL AQUA-MARINE PARK
SCHOOL ON THE AIR POST HARVEST HANDLING AND MARKETING OF CORN GRADUATION GIPAHIGAYON
MGA SCHOOL ON THE AIR GRADUATES MIPASALAMAT SA REHIYONAL UG PROBINSYAL NGA BUHATAN SA SCHOOL ON THE AIR PROGRAM
==
DETALYE:
PADAYONG PROGRAMA SA MAAYONG PANGLAWAS NI GOVERNOR HERMIE RAMIRO SA LUNGSOD SA BONIFACIO GIKALIPAY PAG-AYO SA KATAWHAN NGA NAKAPAHIMULOS
Gipasabot ni kanhi konsehal sa nasangpit nga lungsod nga si Mr. Vicente delos Santos sa Barangay De Fernan, nga dako ang ilang kalipay sa padayong paghatod ni Governor Hermie Ramiro sa mga basic services alang sa nagkalain-laing barangay dili lamang sa kabarangayan sa Lungsod sa Bonifacio, apan lakip na sa tibuok probinsya sa Misamis Occidental.
Kahinumdoman nga gikan adtong Huwebes Enero 26 ug hangtod na sa Adlawng Sabado Enero 28, 2012 sud sa tulo ka adlaw nga pagpahigayon sa Medical ug Dental Outreach Mission nga padayong gihatod sa gobernadora alang sa serbisyo sa maayong panglawas sa katawhan.
Aduna nay walo ka barangay ang nakatagamtan sa libreng check-up sa mga doktor, libreng ibot sa mga daot nga ngipon sa mga kaigsoonan, libreng tuli sa mga kabataan ug ingon man ang libreng tambal nga padayong gipasinati sa katawhan sa maong lungsod.
Gipasabto usab ni Governor Hermie Ramiro, nga bisan tuod ug wala siya makadaog adtong nakalabayng pinili-ay sa pipila ka mga barangay sa nahisgotang lungsod apan suma pa niya patas ang iyang paghatod sa mga nag unang serbisyo alang sa tanan.
Usa sa iyang gipadayag nga patas nga serbisyo alang sa tanang katawhan sa probinsya, labi na ang paghatag ug tag Singkwenta Mil Pesos alang sa 490 ka mga barangay sa tibuok Probinsya sa Misamis Occidental.
==
MGA OPESYALES SA LUNGOD SA BONIFACIO, MIPADAYAG SA ILANG DAKONG PASALAMAT NGADTO NI GOV. RAMIRO BUNGA SA PADAYONG PAGHATAG SA MGA NAG-UNANG SERBISYO SA LUNGSOD
Mipadangat sa ilang mainiton nga pagpasalamat sila si Mayor Samson Dumanjug,Vice Mayor Evelyn Dumanjug ingon man, ang mga konsehales ug mga kapitanes nga unang nakapahimulos sa padayon nga paghatag ni Governor Hermie Ramiro sa mga ayudang pinansyal ug ingon man ang paghatod na usab sa Medical ug Dental Outreach Mission sa kabarangayan sa nasangpit nga lungsod.
Gipasabot ni Mayor Samson Dumanjug nga dako ang iyang pasalamat ngadto kang Governor Hermie Ramiro gumikan kay matud pa niya walay puas ang tabang sa gobernadora sa iyang lungsod ug nabati usab nila ang pagpangga ni Governor Hermie Ramiro.
Gani nagkanayon pa ang Mayor nga dili lamang silang mga opesyales ang gipangga sa gobernadora apan lakip na ang katawhan gihatagan usab og dakong pagtagad sa gobernadora.
==
MGA AGRICULTURE TECHNICIAN SA LIMA KA PROBINSYA SA REHIYON DIEZ GIPAILALOM SA USA KA PEST MANAGEMENT TRAINING ON HIGH VALUED CROPS
Nagkadaiyang peste ang midagsang ug mitakboy karon sa mga prutas ug utanon sa mga umahan sa mga mag-uuma karon nga maoy usa sa nahimong hinungdan sa pag-ubos sa produksyon niini.
Kini nga problema ang gihatagan sa rehiyonal nga buhatan sa Department of Agriculture sa usa ka aksyon ug mga pagtuon aron kahatagan kini sa sulbad.
Ang bunga sa nasangpit nga mga pagtuon ang gipaabot gilayon sa mga kawani sa rehiyonal nga buhatan sa departmento sa agrikultura ngadto sa mga agricuturist ug mga technician sa Lima ka probinsya sa Rehiyon Diez, pinaagi sa usa ka Pest Management Training on High Valued Crops.
Ang nasangpit nga training ang gipahigayon dinhi mismo sa probinsya sa Misamis Occidental, diin usa kini sa mga partisipante kauban sa probinsya sa Lanao del Norte, Camiguin, Bukidnon ug Misamis Oriental.
Sulod sa nasangpit nga training subling gipalab-as o girefresh sa mga speakers ang mga kahibalo sa mga agriculturist ug technician sa mga kanhing pagtuon kabahin sa mga dangan o peste sa mga tanom sanglit aduna nay mga kanhing pagtuon o sitwasyon nga daw nataligam-an o nalimtan na nga dapat nga magamit sa ingon niini nga problema sa mga umahan karon.
Gipadayag usab diha sa training ang mga binag-ong pamaagi sa pagsumpo sa mga piste ug usab ang mga bag-ong mga klase sa piste o dangan, mga sistema sa pag-atake niini ngadto sa mga tanom, pag-identify sa kon unsa nga klase sa peste ug sa kon unsaon kini sa pagsumpo.
Gidasig usab sa mga lecturer o speakers ang mga technician sa pagdasig ug pag-awhag usab sa ilang mga ginsakopang mga mag-uuma sa paggamit sa organikong pamaagi sa pagpanguma.
Sa kinatibuk-ang training, nahimong malampuson kini ug dako ang kalipay sa mga partisipanting agriculturist ug mga technician sa mga bag-ong impormasyon nga ilang nasayran nga andam na usab nilang ipaabot o itudlo ngadto sa ilang mga mag-uuma alang sa ikalambo diha sa ilang pagpanguma.
==
MGA TECHNICIAN NGA PARTISIPANTE SA PEST MANAGEMENT TRAINING ON HIGH VALUED CROPS NAKADAYEG SA KAANINDOT SA MISAMIS OCCIDENTAL AQUA-MARINE PARK
Usa ka dakong garbo sa probinsya sa Misamis Occidental partikularmente sa MOAP kon Misamis Occidental Aquamarine Park nga nahimong venue sa gipahigayong Pest Management Training on High Valued Crops nga gipahigayon sa Departmnet of Agriculture Region X nga diin gikan sa nagkalain-laing probinsya sa Rehiyon Diez ang mga agriculturist ug techniciang partisipante niini sama sa Lanao del norte, Bukidnon, Misamis Oriental, Camiguin ug ang Misamis Occidental mismo.
Subay niini, makapalipay ang impression ug pagdayeg sa mga bisista sa kanindot sa dapit ug sa mga talan-awon sa MOAP.
Sumala pa sa Provicial Agriculture Officer sa Camiguin nga usa ka maayong venue ang MOAP alang sa usa ka panagtigom sama sa ilang gihimo nga training sanglit walay disturbo, hingpit ang konsentrasyon sa mga partisipante sa kon unsa man ang gipadayag sa mga speakers ug usab ang maayong akomodasyon niini.
Gidason usab ni ang Center Chief sa nga nasurpresa siya sa kabag-ohan sa estraktura sa MOAP sanglit konkreto na ang Pathway niini nga nakahatag sa kasayon o kahamugaway sa mga bisita sa paglakaw dili sama sa kaniadto nga daw hadlok sanglit kawayan lang kini ug nakapadugang usab sa kaanindot ang mga bag-ong estraktura nga nahimutang sa palibot sa maong dapit.
Gani dasig pa silang mipadayag sa pagpangimbita sa ubang mga kaigsoonan sa pagbisita sa MOAP aron sama nila ila usab nga masinati ang mga kabag-ohan ug ang kaanindot nga suroyan sa nasangpit nga dapit.
SCHOOL ON THE AIR POST HARVEST HANDLING AND MARKETING OF CORN GRADUATION GIPAHIGAYON
Laing mga mag-uuma na usab ang migradwar sa School on the Air Program ang usa sa mga programa sa buhatan sa Department of Agriculture nga nakatabang na og dako sa mga mag-uuma partikularmente diha gayod sa ilang pagdumala sa ilang pagpanguma.
Niadtong milabayng semana, Enero 26 ning tuig 2012, laing 60 ka mga mag-uuma gikan sa lungsod sa Concepcion, Sapangdalaga, Calamba, Baliangao, Tudela ug sa syudad sa Ozamiz ang migradwar sa School on the Air Post Harvest Handling and Marketing of Corn ang malipayong midawat sa ilang mga sertipiko timaan sa ilang mga nakat-unan sa ilang pagtungha pinaagi sa kahanginan.
Atol usab sa nasangpit nga graduation, gihatagan og mga Corn Certified Seeds ug gipasidunggan ang mga top 10 honored graduates nga diin halos giharos sa mga taga-Calamba ang ranking.
Nakuha sa taga- Barangay Diguan, Ozamis City nga si Melvin Parojinog ang Valedectorian Place, Salutatorian si Mildred Medina nga taga-Calamba uban sa unom pa niya nga mga kauban nga nakakuhan sa nagkalin-laing ranking samtang taga-tudela ang nakakuha sa laing duha ka slot sa top 10 nga maoy mikumpleto sa Top 10 Honored Students niini nga season.
Pinaagi sa nasangpit nga programa nakat-on ang mga mag-uuma sa kon unsa ang mga proseso, teknolohiya ug pagdumala sa pagharvest, pagtipig, paglubo, pagpauga, paggaling ug kon unsaon paglikay o pagpreventar sa mycotoxin nga mohugpa sa naharvest nga mais.
Nasayran, nga ang School on the Air Post Harvest Handling and Marketing of Corn ang gisibya sa kahanginan sa Dxdd Radyo Kampana sa Ozamiz City sa matag alas dose sa udto sulod sa tulo kabulan sugod niadtong Agosto 2011 hangtod Nobyembre 2011 pinaagi ni School on the Air Lecturer Nilda Emphasis ang Provincial Information Officer sa Provincial Agriculture Office.
Samtang, mipadangat usab si Congressman Jorge Almonte sa iyang pahalipay sa mga migradwar nga mga mag-uuma pinaagi sa paghatag kanila sa mga vegetables seeds nga ikatanom ug livelihood kits alang sa dugang kahibalo sa ginagmayng panginabuhi.
Ang School on the Air Program sa Provincial Department of Agriculture ang all out supported sa rehiyonal nga buhatan sa departmento sa agrikultura ug sa probinsyal nga pangagamhanan ni Governor Hermie Ramiro.
==
MGA SCHOOL ON THE AIR GRADUATES MIPASALAMAT SA REHIYONAL UG PROBINSYAL NGA BUHATAN SA SCHOOL ON THE AIR PROGRAM
Mapasalamaton ang mga migradwar nga mga mag-uuma sa School on the Air Program niadtong milabayng semana sa rehiyonal ug sa probinsyal nga buhatan sa Department of Agriculture, ni Governor Hermie Ramiro ug sa mga nagpaluyo ug misuporta sa School on the Air Program.
sumala pa nila nga usa ka dakong gasa o tabang ngadto kanilang mga mag-uuma ang nasangpit nga programa sanglit pinaagi niini nahatagan sila sa igong kahibalo sa kon unsa ang mga proseso ug mga teknolohiya diha sa produksyon sa mais nga maoy sagad nila nga produkto.
Mapasaligon usab sila nga gikan sa ilang mga nakat-unan nga ila kining palamboon pinaagi sa paggamit gayod niini diha sa ilang pagpanguma.
Malaumon usab sila nga dili lang unta didto kutob ang kaayuhan nga ilang madawat o nakab-ot kon dili nagalaum sila nga aduna pay mga umaabot nga mga programa nga ila pang kapahimuslan o mas makadugang pa sa ilang mga nakat-unan.
==