TM BALITA
JAN. 26-12
HEADLINES
11TH BARANGAY DAY ANNIVERSARY GISAULOG SA KATAWHAN SA BARANGAY BACOLOD, OZAMIZ CITY
B/CAPT. DIONISIO DETALLA SA BARANGAY BACOLOD NAGPASALAMAT SA MGA OFFICIAL SA SYUDAD UG SA PROBINSYA BUNGA SA SUPORTA GIHATAG NIINI SA IYANG BARANGAY
KABARANGAYAN SA LUNGSOD SA BONIFACIO MAO NA USAB ANG MAKAPAHIMULOS SA MEDICAL AND DENTAL OUTREACH MISSION NI GOVERNOR HERMIE RAMIRO KARONG SIMANAHA
DOÑA CONSUELO ELEMENTARY SCHOOL NGA NAILANG LUNOPANAN NGA ESKWELAHAN ILADO NA KAAYO KARON SA TIBUOK OZAMIZ CITY SA SCHOOL GARDENING PROGRAM
MGA MAGTUTUDLO SA DOÑA CONSUELO ELEMENTARY SCHOOL NALIPAY SA GIHINGUSGANG PROGRAMA SA KAGAMHANANG PROBINSYAL NGA ORGANIC VEGETABLE PRODUCTION
DOLE REGION-10 GIPASIDUNGGAN NI GOVERNOR RAMIRO BUNGA SA GIPANGHATAG NIINI NGA MGA STARTER KITS UG FINANCIAL ASSISTANCE ALANG SA SCHOLARSHIP PROGRAM
==
DETALYE:
11TH BARANGAY DAY ANNIVERSARY GISAULOG SA KATAWHAN SA BARANGAY BACOLOD, OZAMIZ CITY
Mas gihatagan pa karon og dakong pagtagad sa katawhan sa Barangay Bacolod, Ozamiz City ang ika-onse nga anibersaryo sa Araw ng Bacolod 2012.
Kini human nakita ang gisabot ug kooperasyon sa katawhan sa maong barangay atol sa serye sa mga kalihukan sa araw ng barangay.
Matud pa ni Punong Barangay Dionisio Detalla nga kun’ kaniadto, pipila lamang ka mga kaegsuonan ang mipartisipar sa kalihukan, niining higayona halos ang tanan na, kini nga kalamboan, iyang gikalipay ug gipasalamatan niya pag-ayo.
Sa han-ay sa mga kalihukan, kagabi-i, usa ka live band ang gipahigayon sa may basketball court kon diin ang nahimong performer sa live band mao ang grupo sa banda sa MOELCI-II nga gikalingawan pag-ayo sa mga residente.
Kaganihang buntag, usa usab ka motorkada ang gihimo nga milibot sa tibuok barangay sa Bacolod, kuyog niini ang mga napiling hara ug hari nga giapilan sa mga kabataan sa maong barangay.
Gawas sa mga kaubang Barangay Official ug ginsakopang katawhan, gipasalamatan usab sa kapitan ang koordinasyon sa mga magtutudlo sa Bacolod Elementary School.
Malaumon si kapitan detalla nga sa sunod tuig, magpabilin gihapon ang suporta sa katawhan aron sa tuyo nga mas mobibo pa ang tinuig nga kalingawan sa barangay.
==
B/CAPT. DIONISIO DETALLA SA BARANGAY BACOLOD NAGPASALAMAT SA MGA OFFICIAL SA SYUDAD UG SA PROBINSYA BUNGA SA SUPORTA GIHATAG NIINI SA IYANG BARANGAY
Gipasigarbo pag-ayo ni Punong Barangay Dionisio Detalla sa Barangay Bacolod ang iyang mga nahimong programa ug proyekto sulod lamang sa usa pa katuig kapin nga pagserbisyo isip amahan sa barangay.
Usa niini mao ang iyang pagsuporta sa mga kalihukan sa mga kababayen-an ug kabataan sa iyang barangay nga medyo wala nahatagi og pagtagad sa nangaging mga panahon.
Matud pa sa kapitan nga kinahanglan gayud ang ingon niini nga organisasyon sa barangay, kinahanglan ipaaktibo gumikan kay usa usab kini sa dugokan sa kalamboan sa usa ka komunidad.
Gawas sa iyang pagsuporta sa mga nagkadaiyang grupo sa iyang barangay, iya usab nga gipalambo ang pipila ka mga pasilidad sa iyang barangay, sama sa Basketball Court, Barangay Hall, Women’s Building ug mga Barangay Road.
Apan ang nasangpit nga mga tulomanon, dili magmapalampuson kon dili pa usab ang walay pu-as nga suporta sa mga opesyales sa ciudad, labina ni Mayor Nova Princess Parojinog-Echavez ug sa mga opisyales usab sa kagamhanang probinsyal pinaagi sa pagpanguna ni Governor Hermie Ramiro ug Vice Governor Henry Oaminal.
==
DOÑA CONSUELO ELEMENTARY SCHOOL NGA NAILANG LUNOPANAN NGA ESKWELAHAN ILADO NA KAAYO KARON SA TIBUOK OZAMIZ CITY SA SCHOOL GARDENING PROGRAM
Nagto-o ang mga magtutudlo ug mga estudyante nga nagtungha sa doña consuelo elementary school lakip na ang mga guinikanan ug katawhan sa doña consuelo nga ang matag karon ug unya nga pagtaas sa tubig dagat, perenial na nga problema sa katawhan sa maong barangay. Apan ang maong kahimtang, nahimo pa hinuon nga dalan aron magmalambuon ang ilang tulonghaan.
Nasulbad ang maong problema sa dihang nagkasabot ang mga residenete ug mga magtutudlo nga buhatan og punong o reservoir aron didto na mopadulong ang tubig dagat sa higayon nga motaob ug ang maong inisyatiba malampuson.
Matud pa ni Teacher Johnry Buenaflor, ang coordinator sa gulayan ng paaralan sa maong tulonghaan nga sukad nga gihimo ang maong aksyon niadtong 2009 ug hangtod niining higayona, wala nay nahimong paglunop bisan pa man molapas sa normal ang gitas-on sa High Tide.
Sukad usab niadto, gihimo usab nila ang school gardening nga programa usab sa Department of Education nga ang tanang eskwelahan labina sa mga public school, aduna gayu’y utanan.
Tumong niini nga adunay kaugalingong tinubdan sa mga utanon ang tulonghaan alang sa ilang kaugalingong konsumo ug kinitaan.
Wala usab nagdahom ang teaching force sa maong tulonghaan nga nahimo silang numero-uno nga nagpatuman sa gulayan ng Paaralan Program sa tibuok Schools Division sa Ozamiz City ug nahimo usab sila contestant sa Regional Level.
Gani ang Doña Consuelo Elementary School, nahimo usab nga contestant alang sa institution category sa bag-ohay pa lamang gipahigayon nga Organic Vegetable Production Competition sa Provincial Government sa Misamis Occidental.
==
MGA MAGTUTUDLO SA DOÑA CONSUELO ELEMENTARY SCHOOL NALIPAY SA GIHINGUSGANG PROGRAMA SA KAGAMHANANG PROBINSYAL NGA ORGANIC VEGETABLE PRODUCTION
Kun’ kaniadto gigamitan sa Doña Elementary School ang gulayan ng paaralan og inorganic fertilizer o petisidyong kemikal, apan karon mapasigarbuhon sila nga lunlon Organic Material na gayud ang ilang gigamit alang sa pagpatambok sa ilang nagakdaiyang matang sa mga utanon.
Matud pa ni Teacher Johnry Buenaflor, ang Coordinator sa Gulayan sa Paaralan sa maong tulonghaan nga organikong materyales na gayud ang ilang gipanggamit karon human napamatud-an nga maayo og resulta sa ilang mga tanom.
Ang gihingusgang programa usab sa kagamhanang probinsyal, mao usay nakapadasig nila nga hingpit na gayud silang mogamit sa mga organikong abuno ug mga pampatay peste.
Gani sa pagkakaron pinaagi sa ilang kahibalo sa Vermi Casting, ila na usab kining gipaambit ang pamaagi sa pagpadaghan ngadto sa katawhan sa Barangay Doña Consuelo.
Gawas sa gulayan sa paaralan sa school campus mismo nga gidumala sa mga estudyante ug mga magtutudlo, aduna usay kaugalingong garden ang barangay nga giatiman sa mga barangay officials uban sa mga organisasyon.
==
KABARANGAYAN SA LUNGSOD SA BONIFACIO MAO NA USAB ANG MAKAPAHIMULOS SA MEDICAL AND DENTAL OUTREACH MISSION NI GOVERNOR HERMIE RAMIRO KARONG SIMANAHA
Lain na usab unya nga liboang kaigsoonang misamisnon ang makapahimulos sa Medical and Dental Outreach Mission ni Governor Hermie Ramiro, human kini gikatakda nga ipahigayon sa Lungsod sa Bonifacio Misamis Occidental ning semanaha.
Kahinumduman nga liboan na usab ka mga kaigsoonang misamisnon sa kabarangayan sa distrito uno ang nakapahimulos niini niadtong milabayng tuig 2011.
Og ning tuig 2012 ang lungsod sa Bonifacio ang pinakaunang lungsod nga ang kabarangayan niini ang unang mahatdan ni Governor Hermie Ramiro sa Medical and Dental Outreach Mission.
Ang nasangpit nga Medical and Dental Outreach Mission ang magsugod ugmang adlawa, adlawng Hwebes, Enero 26 hangtod Enero 28 ning tuig 2012.
Nasayran nga andam na usab karon ang mga tambal ug medical team sa gobernadora aron sa paghatag sa mga libring serbisyo na usab nga Medical ngadto sa mga kaigsoonang misamisnon sa nasangpit nga lungsod.
Ang Medical and Dental Outreach Mission ni Governor Hermie Ramiro ang usa sa mga programang panglawas nga iyang pagadad-on sa matag pamisita sa gobernadora ngadto sa kabarangayan.isip usa ka gasa ug pasalamat sa gobernadora sa katawhan sa matag barangay nga iyang pagabisitahan nga kanunayng nagsuporta sa mga proyekto ug programa sa iyang administrasyon.
==
DOLE REGION-10 GIPASIDUNGGAN NI GOVERNOR RAMIRO BUNGA SA GIPANGHATAG NIINI NGA MGA STARTER KITS UG FINANCIAL ASSISTANCE ALANG SA SCHOLARSHIP PROGRAM
Gipasidunggan ni Governor Hermie Ramiro ang mga kawani ug ang rehiyonal ug probinsyal nga buhatan sa DOLE sa positibong mga proyekto ug programa niini nga nakatabang sa katawhang misamisnon sa probinsya sa Misamis Occidental.
Kini nga mensahe sa gobernadora ang gipaabot sa iyang representante nga si Provincial Administrator Henry Ken Regalado.
Mipadayag usab sa iyang pasidungog ang gobernadora ngadto sa mga beneficiaries sa mga programa ug proyekto sa rehiyonal ug probinsyal nga buhatan sa Dole sa kabulahan nila nga nakaangkon sa nasangpit nga mga programa ug proyekto sama sa mga Starter Kits ug sa Scholarships.
Gipaklaro sa mensahe ni Governor Ramiro nga malaumon siya nga ang naangkong mga kaayuhan sa matag beneficiaries nga mapalambo ug mapalahutay kini alang usab sa kalamboan sa ilang kaugalingon.
Gidasig usab niini ang mga beneficiaries sa pagpadayon sa kon unsa man ang ilang nasugdan nga kalamboan ilabina ang pagpalambo sa livelihood assistance nga ilang nadawat aron mamahimo kining hinagiban sa pagsagubang sa mga kalisod sa pagpanginabuhi.
==