TM BALITA
JAN. 23-12
HEADLINES
DEPARTMENT OF EDUCATION NALIPAY SA REHABILITASYON NGA HIMUON SA GRANSTAND
MISAMIS OCCIDENTAL PROVINCIAL ATHLETIC COMPLEX DILI LAMANG PANG-SPORTS KON DILI PANG-EMERGENCY USAB MATUD PA SA KAGAMHANANG PROBINSYAL
KAGAMHANANG PROBINSYAL MIPASALIG NGA DILI MAHILABTAN ANG HISTORICAL VALUE SA KAPITOLYO BISAN PA SA HIMUONG KABAG-OHAN SA CAPITOL BUILDING
IKADUHANG DISTRITO POSIBLENG TUTOKAN NA USAB NI GOVERNOR RAMIRO HUMAN SA MGA DAGKONG PROYEKTO SA UNANG DISTRITO
MGA INFRASTRUCTURE PROJECT NGA NAHIMO SA DAKBAYAN SA OZAMIZ GIPASIGARBO NI GOVERNOR RAMIRO
MGA NAGDUMALA SA USAID HEALTH PRO PROGRAM UG MGA LECTURER MALAUMON NGA MAMAHIMONG MALAMPUSON ANG KATUYUAN SA ADOLESCENTS HEALTH ISSUES AND PERSPECTIVES SYMPOSIUM
==
DETALYE:
DEPARTMENT OF EDUCATION NALIPAY SA REHABILITASYON NGA HIMUON SA GRANSTAND
Kun’ aduna man gani mga National Agency nga nahinangop ug nalipay, way lain kon dili ang Department of Education lamang.
Kini ang madasigon nga pamahayag ni Misamis Occidental Schools Division Superintendent Jonathan Dela Peña atol sa press briefing sa gipahigayon nga Ground Breaking sa Major Renovation Sa Capitol Building ug pagpalambo sa Grandstand niadtong Martes.
Matud pa ni Dela Peña nga ang pagpalambo sa grandstand, usa kini ka oportiyonidad sa ilang buhatan labina nga ang Misamis Occidental Schools Division, adunay mga nagkadaiyang kalihukan, provincial man o rehiyonal, usa na niini ang Sports Training ug Competition.
Gani, gipasalamatan usab pag-ayo sa superintendent human niini nasayri nga mahimong magamit ang pipila ka mga bahin sa Misamis Occidental Provincial Athletic Complex alang sa pipila ka mga regular class sa high school kon diin ana-a usab nahimotang ang Misamis Occidental National High School.
Bugti sa higayon nga gihatag sa kagamhanang probinsyal, gipasalig niini nga ilang atimanon ang mga mahinungdanong fasilidad sa MOPAC.
==
MISAMIS OCCIDENTAL PROVINCIAL ATHLETIC COMPLEX DILI LAMANG PANG-SPORTS KON DILI PANG-EMERGENCY USAB MATUD PA SA KAGAMHANANG PROBINSYAL
Gumikan lage kay nanghingusog man usab ang kagamhanang Probinsyal sa Disaster Preparedness Program, kini ang usa sa mga dagkong katuyo-an sa kagamhanang probinsyal nga pundohan ang pagpalambo niini.
Gipasabot sa mga official nga dili layo ang mga posibilidad nga makasinati ang probinsya sa mga nagkadaiyang kalamidad, labina sa mga pagbaha gumikan sa kausaban sa dagan sa panahon niining higayona.
Mas labing maayo nga andam ang kagamhanang probinsyal sa ingon niini nga kahimtang labina ang evacuation area sa posibleng mga apektadong dapit.
Gihimong sanglitanan sa mga official ang nahitabo sa Iligan City ug Cagayan de Oro City nga gumikan sa kadaghan sa mga apektadong pamilya bunga sa pagbaha, naglun-ot ang mga biktima sa gipahimotang nga mga evacuation center kon diin sagad niini mga eskwelahan.
Gawas nga apektado ang mga estudyante sa pagbalik sa klase, makakaluluoy usab ang sitwasyon sa mga evacuee gumikan kay wala pa silay temporaryo o hingpit nga kabalhinan.
Sa ingon niini nga sitwasyon, gamit kaayo ang grandstand gumikan sa kadako ug kalapad sa maong dapit ug luwas usab kini nga temporaryong pagapuy-an alang sa emerhensya nga katuyo-an.
==
KAGAMHANANG PROBINSYAL MIPASALIG NGA DILI MAHILABTAN ANG HISTORICAL VALUE SA KAPITOLYO BISAN PA SA HIMUONG KABAG-OHAN SA CAPITOL BUILDING
Gipasalig ni Governor Hermie Ramiro ug mga sakop sa Sangguniang Panlalawigan nga bisan usa ka gamay nga bahin sa daang estraktura sa Capitol Building, walay mawala o makuha niini.
Kini gibarogan sa mga official bunga sa migawas nga mga kritisismo nga basin dili na mapreserbar ang Historical Value sa Capitol Building gumikan sa himuon nga pagpalambo.
Matud pa sa gobernadora nga ang unang trabaho-on sa konstruksyon mao ang wing o ang kilid sa daang building.
Sa higayon nga makompleto na ang right ug left wings niini, una pa himuon ang pagpalig-on sa orihinal nga pundasyon sa daang building aron sa tuyo nga molig-on kini pagbalig ug luwas na alang sa mga empliyado nga mookupar niini.
Samtang ang mga roof top sa maong building, kinahanglang uyohon usab aron dili na malapsan sa higayon nga mokusog ang pagbundak sa ulan.
==
IKADUHANG DISTRITO POSIBLENG TUTOKAN NA USAB NI GOVERNOR RAMIRO HUMAN SA MGA DAGKONG PROYEKTO SA UNANG DISTRITO
Human napili ug mialagad isip hepe ehekutibo si Governor Hermie Ramiro niadtong Hulyo 2010, nakasentro gilayon ang atensyon sa gobernadora ngadto sa mga kalungsoran ug mga kabarangayan nga sakop sa unang distrito sa Misamis Occidental.
Kini human niya nakita nga daghang mga programa ug proyekto ang gikinahanglan pag-ayo sa katawhan niining dapita.
Kompyansa ang gobernadora nga second priority na lamang ang ikaduhang distrito niining higayona gumikan sa mga programa ug proyekto nga natagamtaman na sa katawhan dinhi, kaniadto nga nag-alagad pa siya isip kongresista sulod sa upat ka termino.
Gikan sa Health Program, financial assistance sa mga People’s Organization, Non-Government Organization, financial support sa mga kabarangayan, Programa Sa Edukasyon, mga Infrastructure Projects ug daghan pang uban, kini napahimuslan gayud sa katawhan sa ikaduhang distrito.
Kini nga mga kaayohan, inanay na usab nga natilawan sa katawhan sa unang distrito sulod sa duha na katuig nga pag-alagad.
Ang Major Renovation sa Capitol Building ug improvement sa Grandstand, mao kini ang usa sa mga major project nga kasamtangan niya karong gipatuman niining panapos na nga bahin sa iyang unang termino.
Gipasalig sa gobernadora nga human niini, posibleng hatagan na usab niya og espesyal nga atensyon ang ikaduhang distrito, gikinahanglan lamang niya ang padayong suporta sa tibuok katawhan sa probinsya.
==
MGA INFRASTRUCTURE PROJECT NGA NAHIMO SA DAKBAYAN SA OZAMIZ GIPASIGARBO NI GOVERNOR RAMIRO
Usa lamang ang renovation sa Capitol Building ug improvement sa Grandstand sa mga major project nga gilaraw ni Governor Hermie Ramiro nga mas makahatag pa og dugang kaayohan sa katawhan labina sa unang distrito.
Matud pa sa gobernadora nga daghang mga dapit sa unang distrito nga potensyal sa mga nagkadaiyang industriya, usa na niini ang mariculture production ug industriya sa agrikultura.
Bisan medyo limitado ang tinubdan sa panalapi sa probinsya apan dili kini imposible kun’ ang tanang katawhan sa probinsya, adunay kooperasyon ug suporta sa tanang mga programa ug proyekto nga ipatuman sa kagamhanang probinsyal.
Gihimong sanglitanan sa gobernadora ang mga dagkong proyekto partikular sa dakbayan sa Ozamiz nga imposibleng mahitabo. Apan pinaagi sa iyang pagkamatinud-anon ug adunay maayong panglantaw sa isig-kaingon, hinungdan nga nahimo kining tinuod.
Usa na niini ang subling pagbukas sa Ozamiz City Airport nga dose na katuig nga wala na magamit ug gumikan sa paghatag og pagtagad sa kanhi kongresista, nahimo kining operational kon diin dalan nga mas miaktibo pa ang lihok sa ekonomoiya sa Ozamiz City.
Samtang ang One Billion Pesos plus Coastal Bypass Road, padayon gihapon karon ang konstruksyon sa proyekto.
Dili usab layo ang posibilidad nga ipadayon sa gobernadora ang bilyones usab nga proyekto sa Panguil Bay Bridge.
==
MGA NAGDUMALA SA USAID HEALTH PRO PROGRAM UG MGA LECTURER MALAUMON NGA MAMAHIMONG MALAMPUSON ANG KATUYUAN SA ADOLESCENTS HEALTH ISSUES AND PERSPECTIVES SYMPOSIUM
Maayong panglawas sa pamilya ilabina sa mga studyante ug sa kabatan-onang kababayen an ang unang gilantaw ni Dra. Wynona Vega uban sa lokal nga pangagamhanan sa lungsod sa tudela ug sa mga nagdumala sa usaid health pro program sapaghimo sa Adolescents Health Issues and Perspectives Symposuim niadtong milabayng semana.
Kahinumduman,nga gipaubos sausa ka Adolescents Health Issues and Perspectives Symposium ang mga graduating students sa Tudela National Comprehensive High School niadtong milabayng semana sa katuyuan nga kahatagan sa kasayuran og mga inpormasyon ang mga tinun-an sa nasangpit nga tunghaan kabahin sa paghimo sa maayong desisyon alang sa ilang maayong kaugmaon human sila mogradwar sa high school.
Diha sa symposuim partikularmente nga gipunting sa mga lecturer ang mga advantages ug mga disadvantages sa pagsulod sa sayong kaminyoon ilabina ang sayong pagbuntis sa batan-ong kababayen-an.
Sumala pa ni Dra. Wynona Vega, nga una niyang gipasalamatan ang suporta sa probinsyal nga pangagamhanan ni Governor Hermie Ramiro sa maong programa nga nagatutok nsa paghatag og giya alang sa maayong kaugmaon sa kabataan aron mahimong mga maayong indibidwal sa komunidad.
Gipakalro ni Doktora Vega nga gumikan sa kakaulang sa panahon karon sa mga ginikanan sa pag-atiman sa ilang mga anak, partikularmente sa kahigayunan nga masusi ang mga kalihukan ug mga personal nga aktibidades niini ang usa sa hinugdan nga naimpluwensya sa mga bisyo ug barkada nga miresulta sa pagkahisalaag niini sa dili maayong desisyon nga diin kadaghan sa kabatan-onan karon sayong nasulod sa kaminyoon.
Gipadayag sa doktora nga alang kaniya ang ilang pagpahigayon sa Adolescents Health Issues and Perspectives Symposuim ngadto sa mga tinun-an sa Tudela National Comprehensive High School, makatabang kini sa pag-umol sa ilang mga maayong kaugmaon ug makahatag usab kanila sa kadasig sa pagpakabuhi sa komunidad nga adunay dakong paglaum nga mamahimong progresibo.
Gipasalamatan usab sa doktora ug sa mga taga-Health Pro ang kadasig sa mga nagdumala ug sa lokal nga pangagamhanan sa lungsod sa Tudela sa pagsanong sa ilang proposal sa nasangpit nga symposuim.
Gikalipay usab nilang mga midumala sa symposuim ang kadasig sa mga tinun-an nga mipartisipar ug seryosong naminaw sa mga hilisgutanan nga gituki sa mga lecturer.
Subay niini malaumon si Doktora Vega Uban sa iyang mga kaubanang lecturer ug mga nagdumala sa Health Pro Program nga pinaagi sa ilang gihatag nga mga katin-awan kabahin sa responsibilidad sa matag tinun-an sa realidad sa kinabuhi ilabina sa pag-umol sa ilang maayong mga kaugmaon, mamahimong lig-on sila sa pag-atubang sa mga responsilidad sa kinabuhi.
Giawhag usab sa doktora ang mga ginikanan sa paggahin gayod og panahon ngadto sa ilang mga anak aron magiyahan ngadto sa maayong dalkan sa kinabuhi.
Gipasabot usab ni Doktora Vega nga isip usa ka doktor andam siya kanunay sa pagsuporta sa programa sa usaid nga health pro program sama sa pagpahigayon sa samang symposuim ngadto sa ubang tunghaan.
Samtang gipahibalo usab ni Grace Villanueva nga ang USAID Health Pro Program sa DOH ang padayong mopalapad sa ilang mga serbisyo ug programa, usa niini ang paghatag sa mga Sympoisuim, pagpahigayon sa mga health classes dili lang sa mga tunghaan kon dili diha usab sa komunidad.
Nasayran nga una nang nahatagan niadtong milabayng tuig 2011 sa phase 1 sa Training and Seminars on Health Perspectives ang mga BHW og mga Health Providers og ning ikaduhang hugna o phase 2 ipahigayon na usab ang samang Training and SEMINARs ning umaabot bulan sa Pebrero ning tuig 2012.
==