GOV.
OCAMPOS NIPADAYAG UG SUGYOT SA CONFED
Gipahigayon
kaniadtong Hulyo 17, 2007 sa Del Rio Splash Resort, Koronadal City,
South Cotabato ang Re-Organization Meeting sa CONFED kun Confederation
of Provincial Governors, City Mayors and Municipal Mayors League
Presidents of Mindanao. Ang nasangpit nga panagtigum gitambongan ni
Governor Loreto Leo S. Ocampos ug sa mga nagkalainlaing Gobernador ug
Mayores sa Mindanao.
Ang Probinsya sa South
Cotabato pinanguluhan ni Governor Daisy Avance-Fuentes ang nahimong
host province sa maong kalihukan.
Ang mga nag-unang
agenda sa maong panagtigum naglakip sa pag-amendar sa constitution and
by laws, ang paghatag ug updates sa mga proyekto sulod sa Super
Regions ug ang proposal sa interfacing tali sa National Government
Agencies ug Local Chief Executives nga gisugyot ni Governor Ocampos.
Subay niini, gipadayag
ni Governor Ocampos ngadto sa mga myembro sa CONFED nga kinahanglan
nga ang kahugpungan makabaton sa kopya sa Medium Term Public
Investment Plan o MTPIP tungod kay kini maghatag ug igong impormasyon
sa mga Local Government Units (LGUs) sa pagbantay sa ilang mga bahin
nga pondo sa mga proyekto nga anaa nasakop sa MTPI. Gipasabot sa
Gobernador nga susama sa nahitabo sa P900 M nga budget sa Panguil Bay
Bridge Project diin kini gire-align kun gibalhin ngadto sa laing
projects. Apan gumikan sa reklamo ug paningkamot sa Gobernador, ang
nasangpit nga pondo ang gibalik ra usab sa dapatan niini nga mao ang
Panguil Bay Bridge Project.
Tungod niini, giawhag
ni Governor Ocampos ang CONFED nga kinahanglan nga adunay gayoy kopya
sa MTPIP aron dili masinati ang susumang sitwasyon ngadto sa ubang
LGUs.
Kahimumduman, nga ang
CONFED gituyo pagmugna kaniadtong 1990 sa mga Local Chief Executives
sa probinsya ug kalungsuran sa tumong nga mahatagan ug lig-on nga
koordinasyon ang tanang paningkamot alang sa mga proyekto sa matag
Local Government Unit aron makab-ot ang kinatibuk-ang kalambuan sa
isla sa Mindanao.
PROVINCIAL
INFORMATION OFFICE
CAPITOL, OROQUIETA CITY
